విజయవాడ కార్పొరేషన్ ఎన్నికల కోసం జనసేన సమాయత్తం; పవన్‌కళ్యాణ్ తుది నిర్ణయం తీసుకోనున్నారు

విజయవాడ మున్సిపల్ కార్పొరేషన్ ఎన్నికలకు జనసేన సమాయత్తం అవుతోంది. రాజధాని ప్రాంతం కావడంతో విజయవాడపై పార్టీ ప్రత్యేక దృష్టి పెట్టింది. స్థానిక సంస్థల ఎన్నికల్లో ఎక్కువ స్థానాల్లో పోటీ చేయడానికి పార్టీ భూమికను సిద్ధం చేసుకుంటోంది.

ఈ క్రమంలో ఇటీవల జరిగిన సమీక్ష సమావేశంలో జనసేన నేతలు వ్యూహం రూపొందించారు. మంత్రి నాదెండ్ల మనోహర్, మంత్రి కందుల దుర్గేష్, ఎమ్మెల్యేలు బొలిశెట్టి శ్రీనివాస్, వంశీ కృష్ణ యాదవ్, ఎమ్మెల్సీ హరిప్రసాద్, ఎన్టీఆర్ జిల్లా అధ్యక్షుడు సామినేని ఉదయభాను పాల్గొన్నారు. డివిజన్ల వారీగా పార్టీ బలాబలాలు, క్యాడర్ పరిస్థితిపై వీరు చర్చించారు.

గత కార్పొరేషన్ ఎన్నికల్లో పరిస్థితులు అనుకూలించకపోయినా, జనసేన 39 స్థానాల్లో పోటీ చేసి 50,000 ఓట్లు సాధించిందని నాదెండ్ల మనోహర్ గుర్తు చేశారు. పార్టీ కోసం త్యాగం చేసిన కార్యకర్తలను జనసేన గుర్తుంచుకుంటుందని చెప్పారు. ఈసారి గెలుపు సామర్థ్యం ఉన్న అభ్యర్థులను ఎంపిక చేసుకోవాలని నాయకత్వం సూచించింది. ఎన్ని స్థానాల్లో పోటీ చేయాలి, ఎక్కడ పోటీ చేయాలి అనే తుది నిర్ణయం పార్టీ చీఫ్ పవన్ కళ్యాణ్ తీసుకుంటారని మనోహర్ తెలిపారు.

కూటమి ధర్మాన్ని పాటిస్తూనే పార్టీ నిర్మాణానికి కృషి చేయాలని, క్షేత్ర స్థాయి పర్యటనలతో సంస్థాగత బలోపేతం కోసం పవన్ కళ్యాణ్ నేతలకు సూచించారని మనోహర్ వివరించారు. విజయవాడలో జనసేనకు బలమైన క్యాడర్ ఉందని, రానున్న ఎన్నికల్లో తమ బలం చూపించాలని మంత్రి కందుల దుర్గేష్ పిలుపునిచ్చారు. కూటమి పార్టీలన్నీ కలిసి పనిచేస్తే విజయం సాధ్యమవుతుందని అన్నారు.

ఈ నేపథ్యంలో ఈసారి జనసేన అధిక స్థానాలు కోరవచ్చన్న చర్చ జరుగుతోంది. స్థానిక ఎన్నికల కోసం అభ్యర్థుల ఎంపిక ఇప్పటి నుంచే మొదలైంది. అయితే, మిత్రపక్షాల మధ్య సమన్వయం కీలకమని, ఆ దిశగా ప్రయత్నాలు కొనసాగుతున్నాయి.