జపం చేసేటప్పుడు పాటించాల్సిన ముఖ్యమైన నియమాలు

జపం మూడు రకాలుగా ఉంటుంది: వాచికం (బిగ్గరగా చదవడం), ఉపాంశువు (పెదవులు కదిలిస్తూ చిన్నగా చదవడం), మానసికం (మనసులో మాత్రమే చదవడం). వాచికం కంటే ఉపాంశువు గొప్పది. ఉపాంశువు కంటే మానసిక జపం అన్నిటికంటే గొప్పదని శాస్త్రాలు చెప్తున్నాయి.

జపం చేసేటప్పుడు నేల మీద కూర్చోకూడదు. ప్రత్యేకమైన ఆసనం మీద కూర్చొని జపం చేయాలి. దర్భాసనం (దర్భ చాప) మీద కూర్చొని జపం చేస్తే మంచి ఫలితాలు కలుగుతాయని చెప్తున్నారు. అయితే ఆడవాళ్ళు దర్భ వినియోగించకూడదు. చిత్రాసనం మీద కూర్చొని జపం చేస్తే కోరికలు నెరవేరుతాయని, కంబలి మీద కూర్చొని జపం చేస్తే దుఃఖం తగ్గుతుందని చెప్తున్నారు.

జపం చేసేటప్పుడు తూర్పు లేదా ఉత్తరం వైపు కూర్చోవాలి. తూర్పు వైపు తిరిగి జపం చేస్తే కోరికలు నెరవేరుతాయి. ఉత్తరం వైపు తిరిగి జపం చేస్తే ధనపరమైన ప్రయోజనాలు కలుగుతాయని చెప్తున్నారు.

జపమాలికతో జపం చేసేటప్పుడు చూపుడు వేలు తాకకుండా మధ్యవేలు, బటన వేలు మాత్రమే ఉపయోగించాలి. జపమాలికను గోముఖి (చిన్న సంచి)లో పెట్టుకొని జపం చేయడం ఉత్తమం. జపమాలికలో మేరుపూస వచ్చినప్పుడు దాన్ని దాటకూడదు. మాలికను తిప్పి మళ్ళీ జపం చేయాలి.

జపం మధ్యలో మాట్లాడాల్సి వస్తే జపమాలికను కుడి చెవికి తగిలించుకొని మాట్లాడాలి. మాట్లాడటం అయిన తర్వాత ఆచమనం చేసి మళ్ళీ జపం ప్రారంభించాలి. ప్రతిరోజూ ఒకే ప్రదేశంలో, ఒకే సమయంలో జపం చేస్తే మంచి ఫలితాలు కలుగుతాయని చెప్తున్నారు.