AI కారణంగా ఉద్యోగాలు పోతున్నాయి: CM రేవంత్ రెడ్డి హెచ్చరిక

తెలంగాణ ముఖ్యమంత్రి రేవంత్ రెడ్డి విద్యార్థులతో మాట్లాడుతూ AI కారణంగా ఉద్యోగాలు పోతున్న తీరుపై తీవ్రమైన హెచ్చరిక చేశారు. ఒకప్పుడు కంప్యూటర్ సైన్స్ లేదా ఇంజనీరింగ్ చదివి అమెరికా వెళ్తే లక్షల రూపాయలు సంపాదించే అవకాశం ఉండేది. కానీ ఇప్పుడు Artificial Intelligence కారణంగా వైట్ కలర్ ఉద్యోగాలన్నీ పోతున్నాయని, కోట్లాది మంది నిరుద్యోగులవుతున్నారని ఆందోళన వ్యక్తం చేశారు.

అయితే AI వైట్ కలర్ జాబులు తీయగలుగుతుందే కానీ బ్లూ కలర్ జాబులు అంటే నైపుణ్య ఆధారిత ఉద్యోగాలు తీయలేదని CM రేవంత్ రెడ్డి స్పష్టం చేశారు. అందుకే తెలంగాణ ప్రభుత్వం ITI లను అడ్వాన్స్డ్ టెక్నాలజీ సెంటర్లుగా మార్చి 119 సంస్థలు ఏర్పాటు చేసిందని, అందులో చేరే విద్యార్థులకు నెలకు రూ. 2000 స్టైఫండ్ ఇస్తున్నారని తెలిపారు.

భవిష్యత్తులో కేవలం ఇంగ్లీష్ భాష సరిపోదని, జర్మన్, జపనీస్, సౌత్ కొరియన్ భాషలు నేర్చుకోవాలని CM సూచించారు. ఆ దేశాలలో కోట్లాది ఉద్యోగాల ఖాళీలు ఉన్నాయని, తెలంగాణ యువత ఆ అవకాశాలు అందిపుచ్చుకోవాలని పిలుపిచ్చారు.

సౌత్ కొరియా గురించి మాట్లాడుతూ ఆ దేశ జనాభా తెలంగాణ రాష్ట్ర జనాభాతో సమానంగా ఉన్నా ఒలింపిక్స్ లో 32 గోల్డ్ మెడల్స్ సాధించిందని, వాటిలో 16 మెడల్స్ ఒక్క స్పోర్ట్స్ యూనివర్సిటీ నుంచే వచ్చాయని చెప్పారు. 140 కోట్ల జనాభా ఉన్న భారతదేశం ఒక్క గోల్డ్ మెడల్ తీసుకురాలేకపోవడం సిగ్గుచేటని అన్నారు.

తెలంగాణ నుంచి యూనికార్న్ కంపెనీలు రావాలని, కేవలం CEO లుగా పని చేయడం సరిపోదని, మనమే కంపెనీలు స్థాపించి యజమానులు కావాలని CM రేవంత్ రెడ్డి యువతను ప్రోత్సహించారు. Young India Skills University మరియు Young India Sports University ద్వారా తెలంగాణ యువతను తీర్చిదిద్దే లక్ష్యంతో ప్రభుత్వం పని చేస్తుందని తెలిపారు.