జూనియర్ ఎన్టీఆర్ రాజకీయ ప్రవేశంపై వైరల్ వార్తలు నిజం కాదని అభిమాన సంఘం స్పష్టీకరణ

జూనియర్ ఎన్టీఆర్ రాజకీయాల్లోకి ప్రవేశిస్తారని సోషల్ మీడియాలో జరుగుతున్న ప్రచారంపై ఆయన అభిమానుల సంఘం స్పందించింది. ఈ వార్తల్లో వాస్తవం లేదని సంఘం స్పష్టం చేసింది.

గత కొంతకాలంగా, ఈ నెల 18వ తేదీన జూనియర్ ఎన్టీఆర్ రాజకీయ ప్రకటన చేస్తారని ప్రచారం జరుగుతోంది. తమిళనాడు ముఖ్యమంత్రి విజయ్ బాటలో నడుస్తారని కూడా వార్తలు వచ్చాయి. అదే రోజు 'ఊరువాడ' అనే కార్యక్రమంలో ఎన్టీఆర్ పాల్గొంటారని కూడా సోషల్ మీడియాలో చెప్పుకున్నారు.

ఈ నేపథ్యంలో, ఎన్టీఆర్ అభిమాన సంఘం ఒక లేఖ విడుదల చేసింది. ఊరువాడ కార్యక్రమానికి ఎన్టీఆర్‌తో ఎలాంటి సంబంధం లేదని, ఆయన ఎలాంటి కార్యక్రమంలోనూ పాల్గొనడం లేదని లేఖలో స్పష్టం చేసింది. అసత్య ప్రచారాలను నమ్మొద్దని సంఘం అభిమానులకు విజ్ఞప్తి చేసింది. అలాగే, అధికారిక ప్రకటనలు మాత్రమే ఎన్టీఆర్ స్వయంగా చేస్తారని, సంఘానికి అధికారిక కార్యవర్గం లేదని కూడా తెలిపారు.