పోలవరం ప్రాజెక్టు పనులను ఏరియల్ సర్వే ద్వారా పరిశీలించిన సీఎం చంద్రబాబు

ఏలూరు జిల్లా పోలవరం ప్రాజెక్ట్ ప్రాంతాన్ని సీఎం చంద్రబాబు నేడు సందర్శించారు. ఏరియల్ సర్వే ద్వారా వరద పరిస్థితిని పరిశీలించారు. ప్రాజెక్ట్ పనులను క్షేత్రస్థాయిలో సమీక్షించారు.

ఈ సమీక్షలో ఎర్త్ కమ్ రాక్ ఫిల్ డ్యాం (ECRF) పనుల పురోగతిపై దృష్టి పెట్టారు. గ్యాప్-1 పనులు 48% కంటే ఎక్కువ పూర్తయ్యాయి. గ్యాప్-2 పనుల్లో 29% పూర్తయింది. వరదల సీజన్ లో పనులు ఆగకుండా డీ వాటరింగ్ ఏర్పాట్లు చేస్తున్నట్లు అధికారులు వివరించారు.

2027 పుష్కరాల లోపు ప్రాజెక్ట్ తొలి దశను పూర్తి చేయాలన్నది ప్రభుత్వ లక్ష్యం. ఈ నేపథ్యంలో నిర్మాణ వేగాన్ని పెంచే అంశంపై చర్చించారు.

నిర్వాసితుల పరిహారం విషయంలో కేంద్రం నుండి రూ.8,323 కోట్ల అడ్వాన్స్ వచ్చింది. వీటిలో రూ.2,250 కోట్లను నిర్వాసితులకు పంపిణీ చేశారు. మిగిలిన నిధుల లభ్యతపై సమీక్ష జరిగింది.

పోలవరాన్ని టూరిజం హబ్‌గా మార్చేందుకు 10,000 ఎకరాల్లో లైడర్ సర్వే పూర్తి చేసి ప్రణాళిక రూపొందిస్తున్నట్లు అధికారులు తెలిపారు. ఈ విషయంపై కూడా ఈరోజు చర్చ జరిగే అవకాశం ఉంది.