పూరి జగన్నాథ రథయాత్ర: ఆధ్యాత్మిక అర్థం ఇదే

పూరి జగన్నాథ రథయాత్ర ప్రతి సంవత్సరం ఆషాఢ శుక్ల ద్వితీయ నాడు ప్రారంభమవుతుంది. ఈ సందర్భంగా రథయాత్రలోని ఆధ్యాత్మిక ప్రాముఖ్యతను పండితులు వివరిస్తున్నారు.

సాధారణంగా భక్తులు ఆలయానికి వెళ్లి దేవుడిని దర్శిస్తారు. కానీ రథయాత్రలో భగవంతుడే తన భక్తుల వద్దకు వస్తాడని చెప్పబడుతోంది. కృష్ణుడు, రాముడు, శివుడు వంటి దేవతల కథల్లో భక్తి పట్ల ప్రీతితో వారు భక్తుల చెంతకు వచ్చినట్లు చెప్తారు. ఇదే సంకేతంగా రథయాత్ర జరుగుతుంది.

రథయాత్రలో మరో ముఖ్యమైన అర్థం ఉంది: రథం శరీరానికి ప్రతీక. శరీరాన్ని ఆత్మ రూపంలో పరమాత్మ నడుపుతున్నాడని, మన కోరికలను కళ్ళాలుగా నియంత్రించి భగవంతుని వైపు జీవితాన్ని మళ్లించాలని బోధిస్తారు.

రథానికి ముందు మహారాజు స్వయంగా బంగారు చీపురుతో ఊడవడం ప్రత్యేక ఆచారం. దీని అర్థం భగవంతుడి ముందు రాజు, బీదవాడు అనే తేడా లేదని, భక్తిని మాత్రమే గమనిస్తాడని సూచిస్తుంది. ఈ ఆచారాలన్నీ భక్తులు శరీర, మనస్సులను దేవుడికి సమర్పించాలనే సందేశాన్ని ఇస్తాయి.