ఆషాడ మాసంలో బోనాలు, గోరింటాకు, తొలి ఏకాదశి విశిష్టత

ఆషాడ మాసం అనే పేరు పూర్వాషాడ, ఉత్తరాషాడ నక్షత్రాల నుంచి వచ్చింది. జ్యేష్ఠం తర్వాత వచ్చే ఈ మాసంలో తొలి జల్లులు ప్రారంభమవుతాయి.

ఆషాడంలో అత్యంత ముఖ్యమైన పండుగ బోనాలు. ‘బోనం’ అనే పదం ‘భోజనం’ నుంచి వచ్చింది. అమ్మవారికి భక్తితో సమర్పించే నైవేద్యాన్ని బోనం అంటారు. 1813లో సికింద్రాబాద్‌లో ప్లేగు వ్యాధి తగ్గాలని అప్పన్న అనే సైనికుడు మొక్కుకోవడంతో ఈ సంప్రదాయం మొదలైందని ఆధ్యాత్మిక వేత్త శ్రీమతి సన్నిధానం లక్ష్మి తెలిపారు. మట్టి కుండల్లో నైవేద్యం తీసుకువెళ్లి, పసుపు, సున్నం ఉపయోగించడం ఆరోగ్య రక్షణకు సంకేతం.

ఆషాడంలో ఆడవారు గోరింటాకు పెట్టుకోవడం ఒక ప్రత్యేకత. ఇది వేడి వాతావరణం నుంచి ఉపశమనం, చర్మ సంరక్షణకు ఉపయోగపడుతుందని పెద్దలు చెప్పారు. ఆషాడ మాసం ప్రారంభంలో లేదా ప్రతి ఆదివారం, పౌర్ణమి లోపల గోరింటాకు పెట్టుకోవాలని సంప్రదాయం.

కొత్తగా పెళ్లయిన జంట ఆషాడంలో కలిసి ఉండరాదనే నియమం కూడా ఉంది. దీనికి వ్యవసాయ పనులు, ఆరోగ్య కారణాలు ప్రధానం. నాట్లు వేయడం వంటి పనుల వల్ల, అంటు వ్యాధుల నివారణ కోసం ఈ విధానం ఏర్పడిందని లక్ష్మి వివరించారు.

ఆషాడం నుంచి తొలి ఏకాదశి ప్రారంభమవుతుంది. ఈ రోజు నుంచి విష్ణువు యోగనిద్రలోకి వెళతాడని విశ్వాసం. నాలుగు నెలల పాటు ఈ యోగనిద్ర కొనసాగుతుంది. ఈ రోజు ఉపవాసం, పూజలు చేయడం ఆచారం. ఏకాదశి రోజున నియమానుసారం పేలాల పిండి, బెల్లంతో చేసిన నివేదన స్వీకరిస్తారు.

ఆషాడంలో గృహప్రవేశాలు, వివాహాలు, ఉపనయనాలు వంటి శుభకార్యాలు చేయరు. ఇది శూన్య మాసం అని పిలుస్తారు. ఆధ్యాత్మిక సాధన, దానధర్మాలు చేయడానికి ఈ మాసం అనుకూలం. గొడుగు, చెప్పులు, బెల్లం, ఉప్పు వంటి దానాలు ఇవ్వాలని సంప్రదాయం.