బ్యాంకు లోపంతో పెన్షనర్‌ ఖాతాలో ₹759 కోట్ల బ్యాలెన్స్

బిహార్ రాష్ట్రంలోని ముజఫ్పూర్ జిల్లాలో ఓ వృద్ధుడి బ్యాంకు ఖాతాలో ₹759 కోట్ల బ్యాలెన్స్ కనిపించింది. కామన్ సర్వీస్ సెంటర్‌లో ఆయన పెన్షన్ డ్రా చేశాక తన అకౌంట్ బ్యాలెన్స్ ఎంత ఉందో చూడమని సిబ్బందిని కోరారు. సిస్టమ్‌లో చూడగా 759 కోట్ల రూపాయలు డిస్ప్లే కావడంతో అక్కడి సిబ్బంది షాక్‌కు గురయ్యారు.

82 ఏళ్ల కామేశ్వర్ మిశ్ర అనే పెన్షనర్‌ తన వృద్ధాప్య పెన్షన్ తీసుకోవడానికి స్థానిక సీఎస్సీ సెంటర్‌కు వెళ్లారు. ఆయన అభ్యర్థన మేరకు బ్యాలెన్స్ చెక్ చేయగా ఈ అసాధారణ లోపం బయటపడింది. ఆ తర్వాత ఆయన దివ్యాంగ కుమారుడి ఖాతాను చూడగా అక్కడ కూడా సరిగ్గా 759 కోట్లు ఉన్నట్లు కనిపించింది. రెండు ఖాతాల్లో కలిపి ఏకంగా 1,518 కోట్ల రూపాయలు ఉన్నట్లు డిస్ప్లే అయింది.

సీఎస్సీ నిర్వాహకులు వెంటనే స్థానిక పోలీసులకు, సంబంధిత బ్యాంకు అధికారులకు సమాచారం ఇచ్చారు. బ్యాంకు అధికారులు దీన్ని ఓ సాంకేతిక లోపంగా భావిస్తున్నారు. సిస్టమ్ ఎర్రర్ వల్ల ఇలా జరిగి ఉండొచ్చని వారు అంచనా వేస్తున్నారు. ప్రస్తుతం ఆ రెండు ఖాతాలనూ అధికారులు తాత్కాలికంగా హోల్డ్‌లో ఉంచారు. ఈ లోపం ఎలా, ఎందుకు జరిగిందనే దానిపై దర్యాప్తు కొనసాగుతోంది.