అసోంలో విదేశీయులుగా ప్రకటించిన 27 మందికి సుప్రీంకోర్టు ఊరట

అసోంలో విదేశీయులుగా ప్రకటించిన 27 మంది వ్యక్తులపై ఎలాంటి కఠిన చర్యలు తీసుకోరాదని సుప్రీంకోర్టు ఆదేశించింది. ఈ ఆదేశం వారి పౌరసత్వ హోదాపై ట్రిబ్యునళ్లు తాజా విచారణ జరిపేంతవరకు అమల్లో ఉంటుంది.

పౌరసత్వాన్ని ధ్రువీకరించే ప్రక్రియ అత్యంత పారదర్శకంగా, న్యాయబద్ధంగా ఉండాలని సుప్రీంకోర్టు సూచించింది. పాత ఓటర్ల జాబితాలో తమ పేర్లలో అక్షర దోషాలు, స్వల్ప వ్యత్యాసాలను సాకుగా చూపి తమను విదేశీయులుగా ప్రకటించారని పిటిషనర్లు ఆరోపించారు. దీనిపై వీరు సుప్రీంకోర్టును ఆశ్రయించారు.

ఈ కేసు విచారణ సందర్భంగా సుప్రీంకోర్టు గతంలో గువహటి హైకోర్ట్ ట్రిబ్యునల్స్ ఇచ్చిన తీర్పును పక్కన పెట్టింది. పౌరసత్వం, విదేశీయుల హోదా వంటి అంశాలు రాజ్యాంగపరంగా, చట్టపరంగా అత్యున్నత ప్రాముఖ్యత కలిగినవని కోర్టు పేర్కొంది. పౌరసత్వంపై వ్యక్తులు చేసే అక్రమ వాదనలను నిరోధించాల్సిన బాధ్యత ప్రభుత్వానికి ఉన్నప్పటికీ, చట్టబద్ధమైన రక్షణలను విస్మరించరాదని స్పష్టం చేసింది.

ఈ ఉత్తర్వులు కేవలం నిష్పాక్షికమైన పునర్విచారణను నిర్ధారించడానికి మాత్రమే పరిమితమని సుప్రీంకోర్టు వెల్లడించింది. పిటిషనర్లు సమర్పించిన పౌరసత్వ అర్హత పత్రాలపై తాము ఎలాంటి వ్యాఖ్యలు చేయటం లేదని కోర్టు తెలిపింది.