జూబ్లీ హిల్స్ సీఐ శ్రీనివాసరెడ్డిపై రూ.2 కోట్ల డిమాండ్ ఆరోపణ, సస్పెన్షన్

జూబ్లీ హిల్స్ పోలీస్ స్టేషన్లో సీఐగా పనిచేస్తున్న శ్రీనివాసరెడ్డిపై ఓ మహిళ తీవ్ర ఆరోపణలు చేసింది. ఫిర్యాదు చేసేందుకు వచ్చిన తన వద్ద నుంచి రూ.2 కోట్లు డిమాండ్ చేశారని, తనతో వివాహేతర సంబంధం పెట్టుకుని గర్భం రాగా బలవంతంగా అబార్షన్ చేయించారని ఆమె ఆరోపించింది. వాట్సప్ చాట్లు, ఆసుపత్రి బిల్లులు, నగదు లావాదేవీల వివరాలు ఆధారాలుగా సమర్పించింది.

బాధిత మహిళ నేరుగా డీజీపీ కార్యాలయంలో ఫిర్యాదు చేసింది. దీనిపై విచారణ చేపట్టిన పోలీసులు శ్రీనివాసరెడ్డిని సస్పెండ్ చేసి, ఏఆర్ ఆఫీసుకు అటాచ్ చేశారు. పూర్తి నివేదిక వచ్చిన తర్వాత చట్టపరమైన చర్యలు తీసుకుంటామని అధికారులు తెలిపారు.

ఈ కేసుకు సంబంధించి సీఐ, మహిళ మధ్య జరిగిన ఫోన్ సంభాషణలో బెదిరింపు, అనుచిత వ్యాఖ్యలు ఉన్నాయి. ఈ రికార్డింగ్ సోషల్ మీడియాలో వైరల్ అయ్యింది. ఇరు వర్గాల వాదనలపై విచారణ జరుగుతోంది.