జూరాల ప్రాజెక్టు నిండుకుండలా: 10 గేట్లు ఎత్తివేత

జూరాల ప్రాజెక్టు నిండుకుండలా మారింది. ఎగువ ప్రాంతాల్లో కురుస్తున్న వర్షాలతో వరద ప్రవాహం భారీగా పెరగడంతో అధికారులు 10 గేట్లు ఎత్తి నీటిని దిగువకు విడుదల చేస్తున్నారు. ఈ సీజన్లో తొలిసారిగా గేట్లు ఎత్తడం గమనార్హం.

కృష్ణా నదిపై ఉన్న ఈ ప్రాజెక్టుకు కర్ణాటక, మహారాష్ట్రల్లో భారీ వర్షాలు కురుస్తుండటంతో ఇన్ఫ్లో పెరిగింది. ప్రాజెక్టు గరిష్ఠ నీటి మట్టం 318.1 మీటర్లకు చేరువైన నేపథ్యంలో గేట్ల ఎత్తివేత జరిపారు. దీంతో భారీ మొత్తంలో నీరు కృష్ణా నదిలోకి విడుదలవుతోంది.

జూరాల జల విద్యుత్ కేంద్రంలో విద్యుత్ ఉత్పత్తి కూడా ప్రారంభమైంది. నీటి విడుదల నేపథ్యంలో దిగువ ప్రాంతాల ప్రజలను అధికారులు అప్రమత్తం చేశారు. ప్రాజెక్టు పరిధిలోని గ్రామాల్లో నీటిపై నిఘా పెట్టాలని సూచించారు.