జూరాల ప్రాజెక్టుకు భారీ వరద: 29 గేట్లు ఎత్తి నీటి విడుదల

జూరాల ప్రాజెక్టుకు కృష్ణా నది నుండి భారీ వరద నీరు పోటెత్తుతోంది. ఎగువ నుండి 1,73,000 క్యూసెక్కుల ఇన్ఫ్లో వస్తోంది. దీంతో 29 గేట్లు ఎత్తివేసి 1,77,230 క్యూసెక్కుల నీటిని దిగువకు విడుదల చేస్తున్నారు.

ప్రస్తుతం ప్రాజెక్టు నీటి మట్టం 317.98 మీటర్లు. పూర్తి స్థాయి నీటి మట్టం 318.516 మీటర్లు. ప్రాజెక్టు సామర్థ్యం 9.657 టీఎంసీలు కాగా, ప్రస్తుతం 8.573 టీఎంసీల నీరు నిల్వ ఉంది.

జూరాల ఎడమ, కుడి కాలువలు, పారలల్ కెనాల్ ద్వారా సాగు, తాగునీటి అవసరాలకు నీరు విడుదల చేస్తున్నారు. అలాగే కోయిల్సాగర్, నెట్టెంపాడు, భీమా లిఫ్ట్ ప్రాజెక్టులకు పంపుల ద్వారా నీటిని ఎత్తిపోస్తున్నారు. జూరాల ఎగువ, దిగువ జల విద్యుత్ కేంద్రాల్లో 10 యూనిట్ల ద్వారా 397 మెగావాట్ల విద్యుత్ ఉత్పత్తి జరుగుతోంది.

పశ్చిమ కనుమల్లో వర్షాలు కొనసాగుతుండటంతో మరో 4-5 రోజులు ఇదే తరహా వరద ప్రవాహం కొనసాగుతుందని అధికారులు అంచనా వేస్తున్నారు. మరో 10 రోజుల పాటు ఇన్ఫ్లో వస్తే శ్రీశైలం ప్రాజెక్ట్ కూడా నిండే అవకాశం ఉంది.

కృష్ణా బేసిన్ ప్రాజెక్టులన్నీ జలకళను సంతరించుకుంటున్నందుకు రైతులు ఆనందం వ్యక్తం చేస్తున్నారు. వరద ఆలస్యమైనా ఇప్పుడు భారీ ఇన్ఫ్లోలు నమోదవడం సాగుకు ఊరట కలిగిస్తోంది.