నిర్మల్‌లో కడెం ప్రాజెక్టు నిండుకుండ; ఎల్లంపల్లి గేట్లు ఎత్తివేత

నిర్మల్ జిల్లాలోని కడెం ప్రాజెక్టుకు భారీగా వరద నీరు వచ్చి చేరింది. ప్రాజెక్టు పూర్తి నీటిమట్టం 700 అడుగులకు గాను 698 అడుగులకు చేరుకుంది. ప్రస్తుతం ప్రాజెక్టులో 3.5 టీఎంసీల నీరు నిల్వ ఉంది. ఇన్‌ఫ్లోగా 7369 క్యూసెక్కుల వరద నీరు వస్తోంది. ప్రాజెక్టు గేట్లను మూసి ఉంచారు.

గత రెండు రోజుల నుంచి కురుస్తున్న భారీ వర్షాల కారణంగా వరద నీరు పెరిగింది. దీంతో కడెం ప్రాజెక్టు నిండుకుండలా మారింది. నిర్మల్ జిల్లా కలెక్టర్ భవేష్ మిశ్ర ప్రాజెక్టును సందర్శించారు. ఇరిగేషన్ అధికారులతో పరిస్థితిని సమీక్షించారు. ప్రాజెక్టు భద్రతపై పలు సూచనలు చేశారు. నీటి విడుదల సమయంలో డ్యామ్ కిందకు ఎవరూ వెళ్లకుండా చర్యలు తీసుకోవాలని అధికారులకు ఆదేశాలు జారీ చేశారు.

గోదావరి పరీవాహకంలోని శ్రీపాద ఎల్లంపల్లి ప్రాజెక్టుకు కూడా భారీగా వరద నీరు చేరింది. ప్రాజెక్టు నీటిమట్టం 148 మీటర్లకు గాను 147 మీటర్లకు చేరుకుంది. 20 టీఎంసీల సామర్థ్యంలో ప్రస్తుతం 18 టీఎంసీల నీరు ఉంది. ఇన్‌ఫ్లో 80,893 క్యూసెక్కులు వస్తుండడంతో 15 గేట్లు ఎత్తి 96,338 క్యూసెక్కుల నీటిని గోదావరిలోకి విడిచిపెడుతున్నారు.

ప్రాణహిత, గోదావరి నదులు ఉప్పొంగుతుండడంతో నదీ తీర గ్రామాల్లో వరద నీరు చేరుతోంది. పంట పొలాల్లోకి నీరు రావడంతో రైతులు ఆందోళన వ్యక్తం చేస్తున్నారు. పంట నష్టపోయిన వారికి ప్రభుత్వం నష్టపరిహారం అందించాలని కోరుతున్నారు. మంచిర్యాల జిల్లా చెన్నూరు, కోటపల్లి లోతట్టు ప్రాంతాలను అధికారులు అప్రమత్తం చేశారు. లో లెవెల్ వంతెనల వద్ద బారికేడ్లు ఏర్పాటు చేసి పోలీసు గస్తీ కొనసాగిస్తున్నారు. పలు గ్రామాలకు రాకపోకలు నిలిచిపోయాయి. కొన్ని గ్రామాలు విద్యుత్ లేక చీకట్లో ఉన్నాయి. ఉమ్మడి ఆదిలాబాద్ జిల్లాలో వరద పరిస్థితి కొనసాగుతోంది.