కైలాస మానససరోవర్ యాత్ర 2026: కేంద్రం కొత్త మార్గదర్శకాలు జారీ

2026 సంవత్సరానికి సంబంధించి కైలాస మానససరోవర్ యాత్ర కోసం కేంద్ర ప్రభుత్వం కొత్త మార్గదర్శకాలు విడుదల చేసింది. యాత్రికులు తప్పనిసరిగా చైనా వీసా, ఎంట్రీ పర్మిట్లు కలిగి ఉండాలని, సరైన పత్రాలు లేకుండా ప్రయాణం చేయొద్దని స్పష్టం చేసింది.

కేంద్ర సూచనల ప్రకారం, గుర్తింపు పొందిన టూర్ ఆపరేటర్ల ద్వారా మాత్రమే ఈ యాత్ర చేపట్టాలి. స్వయంగా వెళ్లడం వల్ల సరిహద్దు ప్రాంతాల్లో చిక్కుకుపోయే ప్రమాదం ఉందని హెచ్చరించింది. యాత్ర మార్గంలో ట్రెక్కింగ్ దూరాన్ని 60 కిలోమీటర్ల నుంచి 38 కిలోమీటర్లకు తగ్గించారు. మొత్తం 1,738 కిలోమీటర్ల ప్రయాణంలో 1,690 కిలోమీటర్లు వాహనాల ద్వారా సాగుతుంది.

కైలాస పర్వతం సముద్ర మట్టానికి 22,000 అడుగుల ఎత్తున ఉంటుంది. ఈ యాత్రకు మూడు మార్గాలు ఉన్నాయి — ఉత్తరాఖండ్లోని లిపులేఖ్ పాస్ (65 కి.మీ.), సిక్కింలోని నాథులా (802 కి.మీ.), నేపాల్ రాజధాని కాట్మండు నుంచి (500 కి.మీ.) చేరుకోవచ్చు.

యాత్రకు ముందు ఢిల్లీలో మూడు రోజుల పాటు ప్రత్యేక శిక్షణ ఇస్తారు. జూన్ 30న యాత్రికులు ఢిల్లీలో రిపోర్ట్ చేయాలి. జూలై 1న ఢిల్లీ హార్ట్ అండ్ లంగ్ ఇన్స్టిట్యూట్లో తప్పనిసరి వైద్య పరీక్షలు నిర్వహిస్తారు. అధికారిక యాత్ర ఢిల్లీ నుంచే ప్రారంభమవుతుంది.

వైద్య సదుపాయాల కోసం రూట్లో డాక్టర్లు, అంబులెన్సులు, అత్యవసర వైద్య సేవలు అందుబాటులో ఉండేలా ఏర్పాటు చేశారు. ఇండో-టిబెటన్ బార్డర్ పోలీస్, ఆర్మీ సిబ్బందితో సహా అన్ని ఏజెన్సీలు భద్రతను సమీక్షించాయి. విభాగాల మధ్య సమన్వయం, కమ్యూనికేషన్‌పై ప్రత్యేక దృష్టి పెట్టారు.