కాకతీయ జూలాజికల్ పార్క్: 380 ఎకరాల్లో విస్తరించిన అద్భుత పర్యాటక స్థలం, పెరుగుతున్న సందర్శకుల తాకిడి

హనుమకొండ నడిబొడ్డున ఉన్న కాకతీయ జూలాజికల్ పార్క్ 380 ఎకరాల విస్తీర్ణంలో అద్భుతమైన పర్యాటక స్థలంగా విరాజిలుతోంది. ఈ జూ పార్క్‌లో 400 జాతులకు చెందిన 1,550 వన్యప్రాణులను సందర్శకులు చూడవచ్చు. చిరుతలు, ఎలుగుబంట్లు, నెమళ్లు, ముసళ్లు, వివిధ రకాల పక్షులు, జింకలు సహా అనేక జంతువులు ఇక్కడ ఉన్నాయి.

సందర్శకుల సంఖ్య పెరగడంతో జూ పార్క్ అధికారులు పలు కొత్త సౌకర్యాలు ఏర్పాటు చేశారు. బ్యాటరీ వాహనాల ద్వారా పార్క్ అంతటా తిరిగేందుకు వీలుగా CC రోడ్లు వేశారు. పిల్లల కోసం గోగో సైకిల్, జంపింగ్ ట్రంపోలైన్ వంటి వినోద పరికరాలను కొత్తగా ఏర్పాటు చేశారు. పచ్చని చెట్లు, పూలమొక్కల మధ్య విహారం చేస్తూ వన్యప్రాణులను చూసేందుకు తెలంగాణ అంతటి నుండి విద్యార్థులు, కుటుంబాలు పెద్ద సంఖ్యలో వస్తున్నారు.

మాంసాహార జీవులు, శాకాహార జీవులు, పక్షులు, సరీసృపాలు అనే నాలుగు విభాగాలుగా జంతువులను సందర్శించేందుకు అవకాశం కల్పించారు. వారాంతపు రోజుల్లో సందర్శకుల సంఖ్య గణనీయంగా పెరిగి లక్షల రూపాయల ఆదాయం వస్తోందని అధికారులు తెలిపారు. త్వరలో పులులను కూడా తీసుకొచ్చేందుకు CZA అనుమతి కోసం ప్రతిపాదన పంపినట్లు అటవీ అధికారులు వెల్లడించారు.

కరీంనగర్, హైదరాబాద్ నుండి కూడా సందర్శకులు వస్తున్నారు. పాఠశాల విద్యార్థులు జంతువులపై అవగాహన పెంచుకునేందుకు ఇక్కడికి తరచూ వస్తున్నారు. ఏనుగు, సింహం వంటి జంతువులను కూడా చేర్చాలని సందర్శకులు కోరుతున్నారు. ఆదాయం పెరుగుతున్న నేపథ్యంలో సందర్శకులకు మరిన్ని కనీస సౌకర్యాలు కల్పించాలని టూరిస్టులు అభ్యర్థిస్తున్నారు.