కాకినాడలో రెండేళ్ల చిన్నారి జ్ఞానేశ్వరి మిస్సింగ్: 23 రోజులైనా ఆచూకీ లేదు

కాకినాడ సమీపంలోని పామాయిల్ తోటలో రెండేళ్ల చిన్నారి జ్ఞానేశ్వరి మిస్సింగ్ కేసులో 23వ రోజు కూడా ఆచూకీ దొరకలేదు. పోలీసులు, NDRF, SDRF బృందాలు తోట మొత్తం గాలించడంతో పాటు డ్రోన్లు, స్నిఫర్ డాగ్లు వినియోగించినా ఎలాంటి క్లూ లభించలేదు.

ప్రస్తుతం పోలీసుల ఆదేశాలతో తోటను పూర్తిగా చదును చేస్తున్నారు. గత మూడు రోజులుగా ట్రాక్టర్ల సాయంతో తోటను క్లీన్ చేస్తున్నారు. సిసి కెమెరా ఫుటేజీ, టవర్ డంప్ డేటా సేకరించి అనుమానితులను విచారించినా ఆచూకీ దొరకలేదు. కిడ్నాప్ కోణంలో కూడా దర్యాప్తు జరుగుతోంది.

తోటలో పాపతో వెళ్లిన కుక్క రెండు రోజుల తర్వాత తిరిగివచ్చి తర్వాత మరణించింది. ఫోరెన్సిక్ ల్యాబ్ నుంచి వచ్చిన పోస్ట్‌మార్టం రిపోర్ట్ ప్రకారం, కుక్కకు పాము కాటు లేదా దెబ్బలు తగల్లేదు. డీహైడ్రేషన్ వల్ల చనిపోయిందని పోలీసులు తెలిపారు. అయితే ఈ రిపోర్ట్పై అధికారిక స్పష్టత రాలేదు.

23 రోజులుగా పాప రాక కోసం తల్లిదండ్రులు ఎదురుచూస్తున్నారు. తల్లి ఆరోగ్యం బాగోక ఆసుపత్రికి తీసుకెళ్లి చికిత్స అందించారు. పోలీసులు కిడ్నాప్ కోణంలో దర్యాప్తు కొనసాగిస్తున్నారు. ఇప్పటికీ ఎలాంటి ఆచూకీ లభించకపోవడం పోలీసులకు సవాలుగా మారింది.