రాయదుర్గంలో అమృత్ 2.0 మంచినీటి పనులకు శంకుస్థాపన చేసిన ఎమ్మెల్యే కాలవ శ్రీనివాసులు

అనంతపురం జిల్లా రాయదుర్గం పట్టణంలో అమృత్ 2.0 మంచినీటి ప్రాజెక్టు పనులకు శంకుస్థాపన జరిగింది. ప్రభుత్వ విప్, రాయదుర్గం ఎమ్మెల్యే కాలవ శ్రీనివాసులు ఈ కార్యక్రమంలో పాల్గొన్నారు.

ఫిల్టరేషన్ పాయింట్ దగ్గర నీటి పునరుద్ధరణ పనులకు భూమి పూజ చేసి ప్రారంభించారు. ఈ ప్రాజెక్టు కింద పట్టణంలో పాతదైన 16 కిలోమీటర్ల ప్రధాన పైప్లైన్‌ను మార్చనున్నారు. వీటిల్లో లీకేజీలు అరికట్టడంతో పాటు మంచినీటి సరఫరా మెరుగవుతుంది.

అదనంగా నాలుగు కొత్త నీటి ట్యాంకులు నిర్మిస్తారు. దీనివల్ల సుమారు 6,500 కొత్త ఇళ్లకు నీటి కనెక్షన్లు ఇవ్వనున్నారు. ఈ పనులన్నీ 78 కోట్ల రూపాయల వ్యయంతో జరుగుతాయని ఎమ్మెల్యే తెలిపారు.

ఈ ప్రాజెక్ట్ వల్ల పట్టణంలో రాబోయే 50 ఏళ్ల వరకూ తాగునీటి సమస్య ఉండదని కాలవ శ్రీనివాసులు చెప్పారు. అమృత్ 2.0 పథకం కింద కేంద్ర, రాష్ట్ర ప్రభుత్వాలు నిధులను మంజూరు చేసినట్లు వివరించారు. పెరుగుతున్న జనాభా దృష్ట్యా ఈ పనులు త్వరితగతిన పూర్తి చేయాలని అన్నారు.