మెడికో ప్రియాంక క్రిటికల్ పరిస్థితి: బ్రెయిన్ స్పందించడం లేదని తండ్రి తెలుపు

కిమ్స్ ఆసుపత్రిలో చికిత్స పొందుతున్న మెడికో ప్రియాంక ఆరోగ్యం విషమంగా ఉంది. ఆమె తండ్రి వెంకటేష్ ఈ విషయాన్ని మీడియాకు తెలిపారు. ప్రియాంక మృత్యువుతో పోరాడుతోందని, డాక్టర్లు చికిత్సలో శ్రమిస్తున్నారని ఆయన వివరించారు.

డాక్టర్లు తన బిడ్డ పరిస్థితిని వివరించారని వెంకటేష్ చెప్పారు. బ్రెయిన్ దాదాపు పూర్తిగా స్పందించడం లేదని, 100% బ్రెయిన్ డెడ్ అయిందా అని నిర్ధారించేందుకు ఆప్నియా టెస్ట్ చేయాలనుకుంటున్నట్లు డాక్టర్లు తెలిపారు. అయితే, ఈ పరీక్ష చేయాలంటే శరీరంలో సోడియం స్థాయిలు సరిగ్గా ఉండాలని, ప్రస్తుతం 160 వద్ద ఉన్న ఆ స్థాయి మరింత తగ్గించాల్సిన అవసరం ఉందని డాక్టర్లు చెప్పినట్లు వెంకటేష్ తెలిపారు.

ఒక శాతం అవకాశం కూడా ఉన్నా తన కూతుర్ని బ్రతికించుకునేందుకు ప్రయత్నించాలని తాను డాక్టర్లను కోరినట్లు వెంకటేష్ చెప్పారు. డాక్టర్లు కూడా సానుకూలంగా స్పందించారని, సోడియం స్థాయిని సరిచేసే మందులు ఇస్తున్నారని తెలిపారు. త్వరలో టెస్ట్ నిర్వహించి ఫలితం చూస్తామని డాక్టర్లు చెప్పినట్లు ఆయన వివరించారు. ఇదిలా ఉండగా, ఏదైనా మిరాకిల్ జరగకపోదా అని కుటుంబం ఆశగా ఎదురుచూస్తోంది.