హైదరాబాద్‌లో నిర్మాణ పనులకు ఇకపై శుద్ధి చేసిన నీరే వాడాలి

హైదరాబాద్ మహానగరంలో నిర్మాణ పనులకు ఇకపై శుద్ధి చేసిన నీటిని (ట్రీటెడ్ వాటర్) మాత్రమే వాడాలని వాటర్ బోర్డు నిర్ణయించింది. ఈ నెల 15 నుంచి ఈ నిబంధన అమల్లోకి వస్తుంది.

హైదరాబాద్ మెట్రోపాలిటన్ వాటర్ సప్లై అండ్ సివరేజ్ బోర్డు (HMWSSB) పరిధిలో దాదాపు 14.5 లక్షల కనెక్షన్లు ఉన్నాయి. ఇంటి అవసరాలకు మంచినీటి సరఫరాలో ఎలాంటి మార్పు ఉండదని అధికారులు చెప్తున్నారు. ఇంటి అవసరాలు కాని పనులకు మాత్రం సివరేజ్ ట్రీట్‌మెంట్ ప్లాంట్లలో శుద్ధి చేసిన నీటిని మాత్రమే వాడాలని సూచించారు.

నవంబర్ 1 నుంచి 'గ్రీన్ ట్యాంకర్' పేరుతో ట్రీటెడ్ వాటర్ సరఫరా మొదలైంది. ప్రస్తుతం రోజుకు దాదాపు 15 లక్షల లీటర్లు సరఫరా చేస్తున్నారు. పార్కులు, ల్యాండ్‌స్కేపింగ్, రోడ్డు మధ్యలోని మొక్కలు, ఔటర్ రింగ్ రోడ్డు వెంబడి ఉన్న పచ్చదనానికి ఈ నీరే వాడుతున్నారు.

బోర్‌వెల్ నీటి వినియోగం తగ్గించి భూగర్భ జలాలను కాపాడాలనేది ఈ నిర్ణయం లక్ష్యం. ఈ అంశంపై CREDAI, NAREDCO ప్రతినిధులు, బిల్డర్లు, మూడు కార్పొరేషన్ల కమిషనర్లతో వాటర్ బోర్డు అధికారులు సమావేశమయ్యారు. అవసరమైన పారామితులను ఈ సమావేశంలో చర్చించారు.

ట్రీటెడ్ వాటర్‌పై నమ్మకం ఏ స్థాయిలో ఉంటుందనే అంశంపై ప్రశ్నలు వచ్చాయి. దీనిపై ప్రజలకు అవగాహన కల్పించేందుకు అధికారులు కృషి చేస్తున్నారు. రాబోయే రోజుల్లో గ్రీన్ వాటర్ ట్యాంకర్ల సంఖ్య పెరుగుతుందని వాటర్ బోర్డు అధికారులు చెప్తున్నారు.