ఏపీలో మూడు రోజులు వర్ష సూచన.. గంటకు 50 కి.మీ వేగంతో ఈదురుగాలులు

ఆంధ్రప్రదేశ్‌లో వచ్చే మూడు రోజులు వర్షాలు కురిసే అవకాశం ఉందని విశాఖపట్నం వాతావరణ శాఖ డైరెక్టర్ పి.ఎల్.ఎన్. మూర్తి తెలిపారు. తూర్పు తెలంగాణ, దానికి ఆనుకుని ఉన్న కోస్తాంధ్ర ప్రాంతంపై ఉపరితల ఆవర్తనం కొనసాగుతోందని ఆయన చెప్పారు.

ఈ ఆవర్తనం సముద్ర మట్టానికి 4.5 నుంచి 5.5 కిలోమీటర్ల ఎత్తులో ఉంది. దీని ప్రభావంతో కోస్తాంధ్రలో ఈరోజు, రేపు, ఎల్లుండి తేలికపాటి నుంచి మోస్తరు వర్షాలు కురుస్తాయని మూర్తి తెలిపారు. ఒకటి లేదా రెండు చోట్ల ఉరుములతో కూడిన జల్లులు పడే అవకాశం ఉంది. పలు ప్రాంతాల్లో ఉరుములు, మెరుపులతో కూడిన వర్షాలు కురిసే సూచనలు ఉన్నాయి.

వర్షాల సమయంలో ఈదురుగాలులు వీచే అవకాశం ఉంది. గంటకు 30 నుంచి 40 కిలోమీటర్ల వేగంతో గాలులు వీస్తాయని, గరిష్టంగా గంటకు 50 కిలోమీటర్ల వేగానికి చేరవచ్చని ఆయన తెలిపారు.

రాయలసీమలోనూ వచ్చే మూడు రోజులు వర్షాలు కురుస్తాయని విశాఖ వాతావరణ శాఖ డైరెక్టర్ తెలిపారు. ఒకటి లేదా రెండు చోట్ల తేలికపాటి నుంచి మోస్తరు వర్షాలు పడతాయని ఆయన స్పష్టం చేశారు.

IMD విడుదల చేసిన ఎక్స్‌టెండెడ్ రేంజ్ అవుట్‌లుక్ బులెటిన్ ప్రకారం, ఈ నెల 11వ తేదీన దక్షిణ అండమాన్ సముద్రంలో ఉపరితల ఆవర్తనం ఏర్పడే అవకాశం ఉంది. దీని ప్రభావంతో ఆగ్నేయ బంగాళాఖాతంలో 13 లేదా 14 తేదీల్లో అల్పపీడనం ఏర్పడవచ్చని బులెటిన్‌లో ఉంది. దీనిపై స్పష్టత రావాలంటే మరో రెండు నుంచి మూడు రోజులు వేచి చూడాల్సి ఉంటుందని మూర్తి తెలిపారు.