ఈ నెల 8 నుంచి 12 వరకు ముచ్చింతల్లో చిన్న జీయర్ స్వామి 70వ తిరునక్షత్ర మహోత్సవాలు

రంగారెడ్డి జిల్లా ముచ్చింతల్లో శ్రీ చిన్న జీయర్ స్వామి 70వ తిరునక్షత్ర మహోత్సవాలు ఈ నెల 8 నుంచి 12 వరకు జరగనున్నాయి. లోకక్షేమం, ప్రపంచ శాంతి, దేశ రక్షణ, రైతుల సంక్షేమం కోసం ఈ ఆధ్యాత్మిక కార్యక్రమాలు నిర్వహిస్తున్నట్లు నిర్వాహకులు తెలిపారు.

కార్యక్రమాల షెడ్యూల్‌ను శ్రీ త్రిదండి అహోబిలం స్వామి, దేవానంద స్వామి మరియు జీవా ట్రస్ట్ సభ్యులతో కలిసి ప్రకటించారు. ఐదు రోజుల ఉత్సవాల్లో మంగళ తరంగిణి, సుందరాకాండ పారాయణం ఉంటాయి. ఈ సందర్భంగా 70 మంది వీర జవాన్లు, శాస్త్రవేత్తలను సత్కరించనున్నారు. వీరితో పాటు 70 మంది మాతృమూర్తులకు కూడా సన్మానం జరుగుతుంది.

ఈ నెల 10వ తేదీ సాయంత్రం 4:30 గంటలకు Statue of Equality వద్ద సామూహిక విష్ణు సహస్రనామ పారాయణం జరుగుతుంది. అదే రోజు సాయంత్రం కార్తీక మాసం మొదటి రోజు కావడంతో, భక్తులు కలిసి దీపాలు వెలిగించి భగవంతుడికి మంగళ హారతి చేయనున్నారు. 8వ తేదీ స్వామివారి పుట్టినరోజు.

చివరి రోజున వివిధ ప్రాంతాల నుంచి, విదేశాల నుంచి తెచ్చిన రామ కలశాలతో శ్రీరామచంద్రుడికి సహస్ర కలశాభిషేకం జరుగుతుంది. ప్రస్తుతం యుద్ధ భయాలు, అనేక ఇబ్బందులు ఎదురవుతున్నాయని స్వామివారు పేర్కొన్నారు. అవన్నీ తొలగిపోయి, సమస్యలను ఎదుర్కొనే శక్తి ప్రజలకు కలగాలనే ఉద్దేశంతో ఈ కార్యక్రమాలు ఏర్పాటు చేసినట్లు ఆయన తెలిపారు.