ములుగులో మంత్రి సీతక్క పర్యటన: రామప్ప దేవాలయంలో ప్రత్యేక పూజలు

తెలంగాణ రాష్ట్ర మంత్రి సీతక్క ములుగు నియోజకవర్గంలోని పలు గ్రామాల్లో పర్యటించారు. పర్యటనలో భాగంగా ములుగు జిల్లాలోని రామప్ప దేవాలయంలో ఆమె ప్రత్యేక పూజలు చేశారు.

అనంతరం గ్రామాల్లో కాంగ్రెస్ పార్టీ జెండాలను ఆమె ఆవిష్కరించారు. ప్రజలతో మాట్లాడి వారి సమస్యలను అడిగి తెలుసుకున్నారు.

కాళేశ్వరం ప్రాజెక్ట్ విషయంలోనూ మంత్రి మాట్లాడారు. BRS ప్రభుత్వ హయాంలో జరిగిన అవకతవకల వల్ల ప్రాజెక్ట్ పూర్తిగా వినియోగంలోకి రాకముందే దెబ్బతిందని ఆమె ఆరోపించారు. ఈ అంశంపై BRS స్పందన లభ్యం కాలేదు.

నీటి నిల్వలపై కేంద్ర డ్యామ్ సేఫ్టీ అధికారుల సూచనల మేరకు జాగ్రత్తలు తీసుకుంటున్నట్లు ఆమె తెలిపారు. రాష్ట్రంలో వర్షాలు లేకపోయినా రైతులను, పేదలను ఆదుకోవాలని ముఖ్యమంత్రి రేవంత్ రెడ్డి ఆలోచిస్తున్నారని ఆమె చెప్పారు.

సన్న వడ్లపై కూడా మంత్రి మాట్లాడారు. పేదలకు ప్రభుత్వం సన్న బియ్యం అందిస్తోందని, అందుకే రైతులు సన్న వడ్లు వేయాలని ఆమె సూచించారు. చేన్ల నుంచే బయటి వ్యాపారులు సన్న వడ్లను ₹4,000 నుంచి ₹5,000 ధరకు కొనుగోలు చేస్తున్నారని ఆమె పేర్కొన్నారు. పంట పెట్టుబడికి తగిన మద్దతు ధర కల్పిస్తామని ఆమె తెలిపారు.