నర్సాపూర్‌లో చెరువు నీటిపై ఆందోళన: రిసార్ట్‌పై రైతుల ఆరోపణ

మెదక్ జిల్లా నర్సాపూర్‌లోని మృగవాణి అలంకారి రిసార్ట్ ఎదుట స్థానికులు ఆందోళన చేపట్టారు. రాయారావు చెరువు నీటిని రిసార్ట్ నిర్వాహకులు అక్రమంగా తోడేస్తున్నారని వారు ఆరోపించారు.

కాటేజీల వద్ద అలంకరణ కోసం చెరువులో మోటార్లు ఏర్పాటు చేసి పైపుల ద్వారా నీటిని తరలిస్తున్నట్టు స్థానికులు చెబుతున్నారు. ఈ చెరువు కింద 520 ఎకరాల్లో దాదాపు 1,000 మంది రైతులు వ్యవసాయం చేస్తున్నారు. చెరువుపై పట్టణ ప్రజలు, మత్స్యకారులు కూడా ఆధారపడి ఉన్నారని వారు తెలిపారు.

గత రెండేళ్లుగా వర్షాభావ పరిస్థితులతో చెరువుకు సరైన నీరు రావడం లేదని రైతులు చెబుతున్నారు. పంటకు ఒక తడి నీరు ఇవ్వాలని కోరితే అధికారులు పర్మిషన్ల పేరుతో వారం రోజుల పాటు తిప్పించారని వారు ఆరోపిస్తున్నారు. అలాంటి నీటిని ప్రైవేట్ అవసరాలకు వాడుతుండటంపై వారు అసంతృప్తి వ్యక్తం చేశారు.

ఫిర్యాదు అందుకున్న అధికారులు చెరువులో ఏర్పాటు చేసిన మోటారును స్వాధీనం చేసుకున్నట్టు తెలుస్తోంది. అయితే ఇది నామమాత్రపు చర్యే అని స్థానికులు విమర్శిస్తున్నారు.

మున్సిపల్, పోలీస్, నీటిపారుదల శాఖ అధికారులకు స్థానికులు మెమోరాండం అందజేశారు. రిసార్ట్‌పై కఠిన చర్యలు తీసుకోవాలని, రైతుల సాగునీటి అవసరాలకు ఆటంకం కలగకూడదని వారు డిమాండ్ చేశారు. ఈ ఆరోపణలపై రిసార్ట్ నిర్వాహకుల స్పందన లభ్యం కాలేదు.