కాళేశ్వరం బ్యారేజీల మరమ్మతుల పర్యవేక్షణ కమిటీ ఢిల్లీలో సమావేశం — 13 రకాల పరీక్షల వివరాలు

కాళేశ్వరం ప్రాజెక్టులోని మేడిగడ్డ, అన్నారం, సుందిళ్ల బ్యారేజీల మరమత్తు పురోగతిని పర్యవేక్షించే ఎన్డీఎస్ఏ సాంకేతిక కమిటీ శుక్రవారం ఢిల్లీలో సమావేశమైంది. ఈ సమావేశంలో మూడు ఆనకట్టల పునరుద్ధరణ కోసం ఇప్పటివరకు రాష్ట్ర అధికారులు జరిపిన పరీక్షల వివరాలను వివరించారు.

కేంద్ర ప్రభుత్వం జూన్ 30న ఈ సాంకేతిక పర్యవేక్షణ కమిటీని ఏర్పాటు చేసింది. కమిటీ ఛైర్మన్‌గా ఎన్డీఎస్ఏ సాంకేతిక సభ్యుడు సమీర్ కుమార్ శుక్ల వ్యవహరిస్తున్నారు. ఇందులో కేంద్ర జల సంఘం డైరెక్టర్లు, కేంద్ర ప్రభుత్వ రంగ సంస్థల ప్రతినిధులు, తెలంగాణ నీటిపారుదల శాఖ ఇంజనీర్లు సభ్యులుగా ఉన్నారు.

సమావేశంలో రాష్ట్ర ప్రభుత్వ సాంకేతిక కార్యదర్శి కె. పరీక్షిత్ మెహరా ప్రెజెంటేషన్ ఇచ్చారు. బ్యారేజీల గేట్ల నాణ్యత, కాంక్రీట్ పటిష్ఠత, లోపలి క్యావిటీలు, బోర్ హోల్ నమూనాలు, జీపీఆర్ పరీక్షలు, జియోటెక్నికల్ ఇన్వెస్టిగేషన్స్, 2డీ, 3డీ మోడల్ స్టడీస్ తదితర 13 రకాల పరీక్షలు చేపట్టినట్లు వివరించారు. అధికారులు ఎన్డీఎస్ఏ తుది నివేదిక తర్వాత తీసుకున్న చర్యలను పూర్తిగా వివరించారు.

పునరుద్ధరణ డిజైన్ల కోసం ఎంపిక చేసిన ఆఫ్కాన్స్ ఇండియా ప్రతినిధులతో కూడా శుక్ల చర్చించారు. తాత్కాలిక కాకుండా పూర్తి స్థాయి డిజైన్లు ఇవ్వాలని సూచించారు. అలాగే, ఇప్పటివరకు జరిగిన పరీక్షల పట్ల సంతృప్తి వ్యక్తం చేశారు. మూడు ఆనకట్లకు శాశ్వత పరిష్కారం కోసం పరస్పర సహకారంతో ముందుకెళ్తామని ఆయన తెలిపారు. ఈ పరీక్షల ఫలితాలను విశ్లేషించి పూర్తి స్థాయి కార్యాచరణ ప్రణాళికతో తదుపరి సమావేశంలో ముందుకురావాలని ఇంజనీర్లకు సూచించారు.

గతంలో రాష్ట్ర ప్రభుత్వం అన్నారం, సుందిళ్ల ఆనకట్టల్లో నీటి నిల్వ, భవిష్యత్ కార్యకలాపాలపై సాంకేతిక సలహా కోరుతూ లేఖలు రాసినా, ఈ సమావేశంలో ఆ అంశం ప్రస్తావనకు రాలేదు. సాంకేతిక పర్యవేక్షణ కమిటీ పరిధి మరమ్మత్తు పర్యవేక్షణకే పరిమితం కావడంతో ఆ అంశంపై చర్చ జరగలేదు. పరీక్షల ఫలితాల విశ్లేషణ అనంతరం మరోసారి కమిటీ సమావేశమయ్యే అవకాశం ఉందని అధికార వర్గాలు తెలిపాయి.