కాళేశ్వరం బ్యారేజీలు: మేడిగడ్డలో ఏడో బ్లాక్‌లోనే సమస్యలు; రబ్బర్ డ్యామ్ ప్రతిపాదన తిరస్కరణ

కాళేశ్వరం ప్రాజెక్టు మేడిగడ్డ, అన్నారం, సుందిళ్ళ బ్యారేజీల పునరుద్ధరణ కోసం చేపట్టిన గ్రౌండ్ పెనెట్రేటింగ్ రాడార్ (GPR) పరీక్షల ఫలితాలు వచ్చాయి. మేడిగడ్డ బ్యారేజీ ఏడో బ్లాక్‌లోనే తీవ్రమైన సమస్యలు ఉన్నట్లు ఈ పరీక్షల ద్వారా తేలింది. మరో రెండు బ్లాక్‌ల్లోనూ అసాధారణ పరిస్థితి ఉన్నట్లు నివేదిక పేర్కొంది. గతంలో నేషనల్ డ్యామ్ సేఫ్టీ అథారిటీ (NDSA) ఈ బ్లాక్‌ను పూర్తిగా తొలగించాలని లేదా ప్రత్యామ్నాయం చూడాలని సిఫార్సు చేసింది.

అన్నారం బ్యారేజీలో ఒక వెంట్ వద్ద మాత్రమే సమస్య ఉన్నట్లు, గతంలో సీపేజీ వచ్చిన వెంట్ల వద్ద ఎలాంటి అనామలీ గుర్తించలేదని GPR నివేదిక తెలిపింది. సుందిళ్ళలో మూడు వెంట్ల గురించి ప్రస్తావించినా తుది నిర్ధారణలో సమస్య లేదని సంబంధిత వర్గాలు పేర్కొన్నాయి.

ఇదిలా ఉంటే, మేడిగడ్డ వద్ద తాత్కాలిక రబ్బర్ డ్యామ్ ఏర్పాటు చేసి నీరు నిలిపే ప్రతిపాదనను నిపుణుల కమిటీ చైర్మన్ సమీర్ కుమార్ శుక్లా తిరస్కరించారు. ఢిల్లీలో శుక్రవారం జరిగిన సమావేశంలో ఈ వ్యవస్థ గోదావరి నదికి సాధ్యం కాదని, బ్యారేజీల పరీక్షల ఆధారంగానే డిజైన్లు ఇవ్వాలని, దీనికి గడువు విధించాలని ఆయన స్పష్టం చేశారు.

జియోటెక్నికల్ పరీక్షలు, స్ట్రక్చరల్ అనాలసిస్ ఇంకా కొనసాగుతున్నాయి. కొన్ని చోట్ల 75 మీటర్ల లోతు వరకు డ్రిల్లింగ్ చేసి బోర్‌హోల్ నమూనాలు సేకరించి విశ్లేషణకు ల్యాబ్‌కు పంపారు. ఫలితాలు వచ్చాక కన్సల్టెన్సీ సంస్థ ఆఫ్రీ డిజైన్లపై కసరత్తు చేస్తుంది. రాష్ట్ర ప్రభుత్వం బ్యారేజీల పునరుద్ధరణకు ప్రాధాన్యం ఇస్తున్నట్లు నీటిపారుదల శాఖ వర్గాలు తెలిపాయి.

జియోటెక్నికల్, స్ట్రక్చరల్ విశ్లేషణ ఫలితాల ఆధారంగా డిజైన్లు అందిన తర్వాతే ముందుకు వెళతామని, తదుపరి నిపుణుల కమిటీ సమావేశంలో మరింత స్పష్టత వస్తుందని ఆ వర్గాలు పేర్కొన్నాయి.