కాళేశ్వరం ఆలయ పునర్నిర్మాణ పనులపై అధికారుల ప్రత్యేక సమీక్ష

జయశంకర్ భూపాలపల్లి జిల్లా కాళేశ్వరంలోని శ్రీ కాళేశ్వర ముక్తీశ్వర స్వామి ఆలయ పునర్నిర్మాణ పనులను అధికారులు క్షేత్ర స్థాయిలో పరిశీలించారు. దేవాదాయ శాఖ కమిషనర్ హనుమంతరావు, ధార్మిక సలహాదారు గోవిందహరి, జిల్లా కలెక్టర్ రాహుల్ శర్మ ఈ పరిశీలనలో పాల్గొన్నారు.

ప్రధాన ఆలయంతో పాటు రామాలయం, జ్ఞానవాపి బావి, శుభానంద అమ్మవారి ఆలయ నిర్మాణ పనుల పురోగతిని వారు సమీక్షించారు. సరస్వతీ ఘాట్‌ను సందర్శించి అష్టతీర్థాల అభివృద్ధి, ఘాట్ల నిర్మాణం, బోట్ జెట్టి ఏర్పాటుపై అధికారులతో చర్చించారు.

అనంతరం వివిధ శాఖల అధికారులతో సమావేశం నిర్వహించారు. గోదావరి పుష్కరాల ఏర్పాట్లు, ఆలయ పునర్నిర్మాణ పనులపై ఈ సమావేశంలో సమీక్ష జరిగింది. కాళేశ్వరాన్ని ప్రముఖ ఆధ్యాత్మిక పర్యాటక కేంద్రంగా తీర్చిదిద్దాలని అధికారులు సూచించారు.

పనుల్లో వేగం తగ్గించకుండా నిర్ణీత గడువులోగా పూర్తి చేయాలని ఆదేశించారు. పుష్కరాల నాటికి భక్తులకు మెరుగైన సౌకర్యాలు కల్పించేందుకు ప్రధాన ఆలయ నిర్మాణ పనులను మార్చి నాటికి పూర్తి చేయాలని స్పష్టం చేశారు.

పనుల పురోగతిపై ప్రతి వారం సమీక్ష నిర్వహించాలని సూచించారు. ప్రతి నెల క్షేత్ర స్థాయిలో పరిశీలిస్తామని అధికారులు తెలిపారు.