కాళేశ్వరం ఆలయ పునర్నిర్మాణ పనుల పరిశీలన.. మార్చి నాటికి పూర్తి చేయాలని ఆదేశం

జయశంకర్ భూపాలపల్లి జిల్లాలోని కాళేశ్వరంలో శ్రీ కాళేశ్వర ముక్తీశ్వర స్వామి ఆలయ పునర్నిర్మాణ పనులు జరుగుతున్నాయి. ఈ పనులను దేవాదాయ శాఖ కమిషనర్ హనుమంతరావ్, ధార్మిక సలహాదారు గోవిందహరి, జిల్లా కలెక్టర్ రాహుల్ శర్మ క్షేత్ర స్థాయిలో పరిశీలించారు.

ప్రధాన ఆలయంతో పాటు రామాలయం, జ్ఞానవాపి బావి, శుభానంద అమ్మవారి ఆలయ నిర్మాణ పనుల పురోగతిని వారు సమీక్షించారు. అనంతరం సరస్వతీ ఘాట్‌ను సందర్శించారు. అష్టతీర్థాల అభివృద్ధి, ఘాట్ల నిర్మాణం, బోట్ జెట్టి ఏర్పాటుపై అధికారులతో చర్చించారు.

వివిధ శాఖల అధికారులతో సమావేశం నిర్వహించారు. ఈ సమావేశంలో గోదావరి పుష్కరాల ఏర్పాట్లు, ఆలయ పునర్నిర్మాణ పనులపై సమీక్ష జరిగింది.

కాళేశ్వరాన్ని ప్రముఖ ఆధ్యాత్మిక పర్యాటక కేంద్రంగా తీర్చిదిద్దాలని అధికారులు సూచించారు. పనుల వేగం తగ్గకుండా నిర్ణీత గడువులోగా పూర్తి చేయాలని ఆదేశించారు. పుష్కరాల నాటికి భక్తులకు మెరుగైన సౌకర్యాలు కల్పించేందుకు ప్రధాన ఆలయ నిర్మాణ పనులను మార్చి నాటికి పూర్తి చేయాలని స్పష్టం చేశారు. పనుల పురోగతిపై ప్రతివారం సమీక్ష నిర్వహించాలని, ప్రతి నెల క్షేత్ర స్థాయిలో పరిశీలిస్తామని తెలిపారు.