కామారెడ్డి కాంగ్రెస్ వర్గపోరు: క్రమశిక్షణ కమిటీ రెండోసారి విచారణ

కామారెడ్డి జిల్లా కాంగ్రెస్ నేతల మధ్య చెలరేగిన వర్గపోరుపై క్రమశిక్షణ కమిటీ రెండోసారి విచారణ ప్రారంభించింది. గాంధీ భవన్‌లో కమిటీ చైర్మన్ మల్లు రవి అధ్యక్షతన సమావేశం జరిగింది. ప్రభుత్వ సలహాదారు షబ్బీర్ అలీ ఈ సమావేశానికి హాజరయ్యారు.

పీసీసీ ప్రధాన కార్యదర్శి గడ్డం చంద్రశేఖర్ రెడ్డి, షబ్బీర్ అలీల మధ్య కొంతకాలంగా వర్గ విభేదాలు కొనసాగుతున్నాయి. ఇటీవల షబ్బీర్ అలీకి చెందినదిగా చెబుతున్న ఒక ఆడియో క్లిప్ సోషల్ మీడియాలో వైరల్ అయింది. ఆ ఆడియోలో ‘పక్కన వేసిన వారికే పార్టీ పదవులు ఇస్తున్నారు’ అనే వ్యాఖ్యలు ఉన్నాయి.

చంద్రశేఖర్ రెడ్డి దంపతులు దీన్ని తీవ్రంగా పరిగణిస్తూ, షబ్బీర్ అలీ వర్గం తమపై సోషల్ మీడియాలో అసభ్యకర పోస్ట్లు పెడుతోందని అధిష్టానానికి, క్రమశిక్షణ కమిటీకి ఫిర్యాదు చేశారు. మరోవైపు, ఈ ఆడియో తనది కాదని, ఎవరో మిమిక్రీ చేసి కుట్రపూర్వకంగా వైరల్ చేశారని షబ్బీర్ అలీ కామారెడ్డి జిల్లా ఎస్పీకి ఫిర్యాదు చేశారు. ఆ ఆడియోను వైరల్ చేసింది చంద్రశేఖర్ రెడ్డి అనుచరులేనని ఆరోపిస్తూ, వారిపై కూడా కమిటీకి ఫిర్యాదు చేశారు.

ఈ నేపథ్యంలో, ఇరువర్గాలను విడివిడిగా విచారిస్తున్న క్రమశిక్షణ కమిటీ, ఆడియో లీక్ చేసిన వ్యక్తులు, పార్టీ క్రమశిక్షణ ఉల్లంఘించిన వారిపై చర్యలు తీసుకునేందుకు సిద్ధంగా ఉన్నట్లు సమాచారం. మొదటి విచారణ ఇప్పటికే పూర్తి కాగా, రెండోసారి సోమవారం నాడు విచారణ కొనసాగింది. షబ్బీర్ అలీతో పాటు ఆయన వర్గాన్ని, చంద్రశేఖర్ రెడ్డి దంపతులను కమిటీ ఎదుట హాజరుపరిచారు. కమిటీ సమగ్ర నివేదిక ఆధారంగా అధిష్టానం ఎవరిపై చర్యలు తీసుకుంటుందనేది రాబోయే రోజుల్లో తేలనుంది.