కామారెడ్డిలో రోడ్డుపై నీరు నిలిచిపోవడంతో కౌన్సిలర్ నిరసన

కామారెడ్డి జిల్లా కేంద్రంలోని కామారెడ్డి-కరీంనగర్ ప్రధాన రహదారిపై పోలీస్ స్టేషన్ సమీపంలో ఇటీవల కురిసిన వర్షాలకు నీరు నిలిచిపోయింది. రోడ్డుపై మోకాళ్ల లోతు నీరు ఉండడంతో ప్రజలు నడవడం, వాహనాలు రాకపోకలు సాగించడం కష్టంగా మారింది.

స్థానిక కౌన్సిలర్ గెరిగంటి లక్ష్మీనారాయణ ఈ సమస్యపై నిరసన తెలుపుతూ రోడ్డుపై నీటిలో కూర్చుని ఆందోళన చేశారు. ఆయన మాట్లాడుతూ, “చాలా మంది అధికారులు ఉన్నా ఎవరూ సమస్య పట్టించుకోవడం లేదు. ఇక్కడ ఒక చిన్న కల్వర్టు కట్టించకపోవడం వల్లే నీరు నిలిచిపోతోంది. వెంటనే కల్వర్టు నిర్మించి నీరు ప్రవహించేలా చర్యలు తీసుకోవాలి” అని డిమాండ్ చేశారు.

ఈ ప్రాంతంలో బ్రిడ్జ్ ఉన్నా సరైన కల్వర్టు లేనందున వాన నీరు నిలిచిపోయి రోడ్డు వినియోగానికి అనువుగా లేదు. కలెక్టర్, ఎమ్మెల్యే రమణారెడ్డి, మున్సిపల్ అధికారులకు విజ్ఞప్తి చేసినా సమస్య పరిష్కారం కాలేదని కౌన్సిలర్ తెలిపారు. అధికారులు త్వరగా స్పందించి శాశ్వత పరిష్కారం చూపాలని ఆయన కోరారు.