కామారెడ్డి: ప్రభుత్వ జూనియర్ కాలేజీలో స్టేట్ టాపర్‌తో అడ్మిషన్లు గణనీయంగా పెరిగాయి

కామారెడ్డి జిల్లా బాన్సువాడ ప్రభుత్వ జూనియర్ కళాశాలలో ఇటీవల వచ్చిన ఇంటర్ ఫస్ట్ ఇయర్ ఫలితాల్లో ఒక విద్యార్థిని స్టేట్ టాపర్ గా నిలిచింది. దీంతో ఈ కాలేజీలో అడ్మిషన్లు ఒక్కసారిగా పెరిగాయి.

కళాశాలలో ఎంపీసీ విద్యార్థిని సాయి వర్షిణి 470 మార్కులకు 468 మార్కులు సాధించి రాష్ట్రస్థాయిలో ప్రథమ స్థానం సంపాదించింది. అలాగే బైపీసీ విద్యార్థిని నిదా తహారిన్ 440 మార్కులకు 434 మార్కులతో రాష్ట్ర ర్యాంక్ సాధించింది. ఈ ర్యాంకులతో కాలేజీ పట్ల విద్యార్థులు, తల్లిదండ్రుల ఆసక్తి విపరీతంగా పెరిగింది.

ఈ ఏడాది కొత్తగా 400 అడ్మిషన్లు నమోదయ్యాయి. గత సంవత్సరంతో పోలిస్తే ఇది రెట్టింపు. ప్రస్తుతం కళాశాలలో 640 మంది విద్యార్థులు చదువుతున్నారు. ప్రైవేటు కళాశాలలకు దీటుగా ఉండేలా డిజిటల్ బోర్డులు, ఆన్‌లైన్ తరగతుల వంటి సౌకర్యాలు కల్పించామని అధ్యాపకులు తెలిపారు.

కాలేజీ ప్రిన్సిపాల్ ఎంఏ సలాం ఆధ్వర్యంలో లెక్చరర్లు అదనపు సమయంలో కూడా తరగతులు నిర్వహిస్తున్నట్లు విద్యార్థులు చెప్పారు. ఉర్దూ మీడియంలో కూడా మంచి ఫలితాలు రావడంతో తల్లిదండ్రులు కార్పొరేట్ కాలేజీల నుంచి తమ పిల్లలను ఇక్కడికి మార్చుకుంటున్నారు.

జిల్లా కలెక్టర్ సహకారంతో మౌలిక వసతులు పెంచినట్లు ప్రిన్సిపాల్ వివరించారు. ఈ విజయాలతో కాలేజీకి రాష్ట్రవ్యాప్తంగా మంచి గుర్తింపు లభించింది.