కామారెడ్డిలో అక్రమ గ్యాస్ రీఫిల్లింగ్.. 75 సిలిండర్లు సీజ్, కేసు నమోదు

కామారెడ్డి జిల్లా బాన్సవాడ మండలం రాజారాం దుబ్బలో అక్రమంగా నిల్వ ఉంచిన 75 గ్యాస్ సిలిండర్లను సివిల్ సప్లై అధికారులు సీజ్ చేశారు. ఈ సిలిండర్లు శంకర్ గౌడ్ అనే వ్యక్తికి సంబంధించినవని అధికారులు తెలిపారు.

డొమెస్టిక్ సిలిండర్ల నుంచి గ్యాస్ తీసి కమర్షియల్ సిలిండర్లలో నింపి ఎక్కువ ధరలకు అమ్ముతున్నట్లు అధికారులకు సమాచారం అందింది. దీంతో వారు ఆ ప్రాంతంలో దాడి చేశారు. సీజ్ చేసిన వాటిలో డొమెస్టిక్, కమర్షియల్ సిలిండర్లు రెండూ ఉన్నాయి.

తూకంలో సుమారు 2 కిలోల వరకు గ్యాస్ తక్కువగా నింపినట్లు అధికారులు గుర్తించారు. నిందితుడిపై కేసు నమోదు చేసినట్లు ASO రవీందర్ రాథోడ్ తెలిపారు.

అక్రమ రీఫిల్లింగ్‌పై చర్యలు తీసుకోవాలని అందిన ఆదేశాల మేరకు అధికారులు బాన్సవాడకు వెళ్లారు. స్థానిక GPO ఆనంద్ హర్ష సహాయంతో సమాచారం సేకరించి, వెంటనే పోలీసులకు తెలియజేశారు.

సీజ్ చేసిన సిలిండర్లను రాధాకృష్ణ గ్యాస్ ఏజెన్సీకి అప్పగించారు. తదుపరి చర్యలు కలెక్టర్ ఆదేశాల ప్రకారం జరుగుతాయని అధికారులు తెలిపారు. సర్వే నంబర్ 93లోని ఈ స్థలం శంకర్ గౌడ్ పేరుతో ఉన్నట్లు MRO కార్యాలయం నుంచి తెలిసింది.