కరీంనగర్‌లో ఖాళీ స్థలాల నీటి నిల్వ; దోమలు, వ్యాధుల ముప్పు

గత వారం రోజులుగా కరీంనగర్ మున్సిపల్ కార్పొరేషన్ పరిధిలో కురుస్తున్న భారీ వర్షాలతో ఇళ్ల మధ్య ఖాళీ స్థలాల్లో నీరు నిలిచింది. పిచ్చి మొక్కలు మోకాల్లోతు పెరిగి, దోమలు, పందులకు ఆవాసాలుగా మారాయి. టైఫాయిడ్, మలేరియా, డెంగ్యూ వంటి విషజ్వరాలు ప్రబలే ప్రమాదం నెలకొంది.

తెలంగాణ మున్సిపల్ చట్టం 2019 లోని సెక్షన్ 161 ప్రకారం, ప్రజారోగ్యానికి భంగం కలిగించే ఖాళీ స్థలాల యజమానులకు నోటీసులు జారీ చేసి శుభ్రం చేయాలని కోరే అధికారం కార్పొరేషన్‌కు ఉంది. గతంలో పట్టణ ప్రగతి కార్యక్రమంలో భాగంగా జేసీబీలతో శుభ్రం చేయించి యజమానులపై జరిమానా వసూలు చేశారు. కానీ ప్రస్తుతం నోటీసుల జారీతోనే అధికారులు సరిపెట్టి, ఆచరణాత్మక చర్యలు తీసుకోవడం లేదని స్థానికులు ఆరోపిస్తున్నారు.

వర్షపు నీరు నిలిచిన ప్లాట్లు, మురుగు కాల్వలు శుభ్రం చేయకపోవడంతో వ్యాధులు వ్యాపించే అవకాశం ఉందని నివాసితులు ఆందోళన వ్యక్తం చేస్తున్నారు. మొత్తం నగరంలో సర్వే చేసి, నోటీసులు జారీ చేసి, స్పందించని వారి స్థలాలను కార్పొరేషనే శుభ్రం చేయాలని స్థానికులు డిమాండ్ చేస్తున్నారు.