కార్తీక మాసం మొదటి రోజు శివాలయాలకు భక్తుల భారీ రద్దీ

కార్తీక మాసం మొదటి రోజు నాడు తెలంగాణ, ఆంధ్రప్రదేశ్‌లోని శివాలయాలకు భక్తులు పెద్ద సంఖ్యలో తరలివచ్చారు. ఆలయాల్లో ప్రత్యేక పూజలు, అభిషేకాలు నిర్వహించారు. దీపాలు ముట్టించి శివుడిని పూజించారు.

కొమురవెల్లి మల్లన్న ఆలయంలో భక్తులు కోడె మొక్కులు చెల్లించారు. యాదాద్రి కొండపై సత్యనారాయణ వ్రతాలు జరిగాయి. ధర్మపురి లక్ష్మీ నరసింహ స్వామి, కాళేశ్వరం ముక్తేశ్వరుడు, వరంగల్ వేయి స్తంభాల గుడి, రామప్ప ఆలయం, కొండగట్టు ఆంజనేయ స్వామి ఆలయాల్లోనూ పూజలు జరిగాయి.

శ్రీశైలం మల్లన్న దర్శనానికి భక్తులు పెద్ద సంఖ్యలో వచ్చారు. కలశ పూజల తర్వాత ధ్వజస్తంభం వద్ద ఆకాశ దీపం వెలిగించారు. కాళహస్తి ఆలయంలోనూ భక్తుల రద్దీ కనిపించింది.

కార్తీక మాసంలో సోమవారం వచ్చినప్పుడు ఆలయాల్లో రద్దీ మరింత పెరుగుతుంది. వరంగల్‌లోని పంచభూత లింగాల శివాలయానికి ప్రత్యేక ప్రాముఖ్యత ఉందని భక్తులు భావిస్తున్నారు. ఈ ఆలయ ముఖద్వారం తెలంగాణలో మరెక్కడా లేదని, కాళహస్తికి ఉన్న ప్రాముఖ్యత ఈ ఆలయానికి ఉందని వారు చెప్తున్నారు.

ప్రతి రోజు ఉదయం నాలుగు గంటల ప్రాంతంలో మహాన్యాస పూర్వక రుద్రాభిషేకం జరుగుతుంది. తర్వాత గర్భాలయంలో అభిషేకాలు నిర్వహిస్తారు. కార్తీక పౌర్ణమి రోజు జ్వాలా తోరణం కార్యక్రమం ఉంటుంది. నెలంతా నోములు, వ్రతాలు కొనసాగుతాయి.