హైదరాబాద్ KBR పార్క్ వన్ వే ట్రాఫిక్ మూడో రోజు ప్రయాణం సులభం

హైదరాబాద్ కేబీఆర్ పార్క్ చుట్టూ అమలవుతున్న వన్ వే ట్రాఫిక్ విధానం మూడో రోజు వాహనదారులకు సులభంగా మారింది. ఈ నెల 18వ తేదీ నుంచి అధికారులు ఈ విధానాన్ని అమలు చేస్తున్నారు.

H-CITI పనుల్లో భాగంగా 7 వంతెనలు, 7 అండర్ పాస్ల నిర్మాణం కోసం KBR పార్క్ చుట్టూ డైవర్షన్లు ఏర్పాటు చేశారు. రోడ్ నెంబర్ 45, జర్నలిస్ట్ కాలనీ, జూబ్లీ చెక్ పోస్ట్ వద్ద ట్రాఫిక్ అధికారులు ప్రత్యేక ఏర్పాట్లు చేశారు. పార్క్ చుట్టూ వాహనాలు ఎడమవైపు మాత్రమే వెళ్తాయి.

తొలి రోజు కొంత ఇబ్బంది ఎదురైనా రెండో, మూడో రోజుల్లో వాహనదారులు రూట్లపై అవగాహన పెంచుకున్నారు. ఉదయం 6 గంటల నుంచి ట్రాఫిక్ అధికారులు డ్యూటీలో ఉంటున్నారు. ప్రతి జంక్షన్ వద్ద మైక్ సెట్లు, సైన్ బోర్డులు, రూట్ మ్యాప్ ఫ్లెక్సీలు ఏర్పాటు చేశారు.

RTC బస్సులకు సంబంధించి 127, 47 నంబర్ బస్సులకు ప్రత్యేక రూట్ మ్యాప్ ఇచ్చారు. ఐటీ కారిడార్‌లోని మాదాపూర్, రాయదుర్గం, హైటెక్ సిటీ, గచ్చిబౌలి ప్రాంతాలకు ట్రాఫిక్ రద్దీ తగ్గింది. సిగ్నల్ పాయింట్లు లేకుండా నేరుగా ప్రయాణం కొనసాగుతోంది.

మరో రెండు, మూడు రోజుల్లో పరిస్థితి మరింత సులభతరం అవుతుందని ట్రాఫిక్ అధికారులు అంచనా వేస్తున్నారు. వాహనదారులు వన్ వే నిబంధనలు పాటించాలని అధికారులు సూచించారు.