KCR ₹2.25 కోట్ల ఆర్థిక సాయం: దివంగత MLA పెద్ది సుదర్శన్ రెడ్డి కుటుంబానికి BRS అండ

BRS అధినేత కేసీఆర్ దివంగత పెద్ది సుదర్శన్ రెడ్డి కుటుంబానికి రూ.2.25 కోట్ల ఆర్థిక సాయం ప్రకటించారు. పెద్ది సుదర్శన్ రెడ్డి నర్సంపేట మాజీ ఎమ్మెల్యే. ఇటీవల గుండెపోటుతో ఆయన మరణించిన విషయం తెలిసిందే.

ఈ సాయంలో భాగంగా పెద్ది సుదర్శన్ రెడ్డి ఇద్దరు పిల్లలైన నిదర్శన్ రెడ్డి, ధర్మిష్టా రెడ్డిలకు చెరో రూ.కోటి అందజేస్తున్నారు. అలాగే ఆయన తల్లి అమృతమ్మకు రూ.25 లక్షలు బ్యాంకు ఖాతాలో జమ చేస్తారు. ఈ మొత్తాన్ని పార్టీ సీనియర్ నేతలు, వరంగల్ జిల్లా ముఖ్య నేతలతో చర్చించిన తర్వాత ఖరారు చేసినట్టు కేసీఆర్ తెలిపారు.

ఇదే సమయంలో పిల్లల చదువు, భవిష్యత్తు అవసరాలు, కుటుంబ సంక్షేమాన్ని పార్టీ నిరంతరం పర్యవేక్షిస్తూ అండగా ఉంటుందని కేసీఆర్ హామీ ఇచ్చారు. పెద్ది సుదర్శన్ రెడ్డి దశదిన కర్మ కార్యక్రమాలు ముగిసిన తర్వాత జిల్లా పార్టీ నేతలు సమావేశమై కుటుంబ సంక్షేమానికి తదుపరి చర్యలపై నిర్ణయం తీసుకుంటారని కేటీఆర్ చెప్పారు.

పెద్ది సుదర్శన్ రెడ్డికి గుండెపోటు రాగా, వరంగల్ లోని రోహిణి ఆసుపత్రి నుంచి యశోద ఆసుపత్రికి తరలించి చికిత్స అందించారు. ఆసుపత్రికి వెళ్లిన కేసీఆర్, కేటీఆర్, హరీశ్ రావులు కుటుంబానికి అండగా ఉంటామని హామీ ఇచ్చారు.