కేదార్‌నాథ్, యమునోత్రి ఆలయాలు మూసివేత.. ఉత్సవ విగ్రహాలు శీతాకాల నివాసాలకు

ఉత్తరాఖండ్‌లోని కేదార్‌నాథ్, యమునోత్రి ఆలయాలను శీతాకాలం కోసం మూసివేశారు. వేద మంత్రోచ్చారణలు, సాంప్రదాయ పూజల మధ్య అర్చకులు ఆలయ ద్వారాలను మూశారు.

కేదార్‌నాథ్ ఆలయంలో తెల్లవారుజామున నాలుగు గంటల నుంచే ప్రత్యేక పూజలు జరిగాయి. సాంప్రదాయ ఆచారాల ప్రకారం పూజలు పూర్తయ్యాక ఉదయం 8:30కి శుభ ముహూర్తంలో తలుపులు మూసేశారు. అనంతరం కేదారేశ్వరుడి ఉత్సవ విగ్రహాన్ని పల్లకీలో ఆలయ ప్రాంగణం చుట్టూ ఊరేగించారు. ఆ విగ్రహాన్ని ఉకీమఠ్‌లోని ఓంకారేశ్వర ఆలయానికి తరలించారు.

ఈ పల్లకీ యాత్ర రాత్రికి రాంపూర్‌లో బస చేస్తుంది. గురువారం గుప్తకాశీ మీదుగా వెళ్లి శుక్రవారం ఓంకారేశ్వర ఆలయానికి చేరుకుంటుంది. రాబోయే ఆరు నెలల పాటు భక్తులు అక్కడే స్వామిని దర్శించుకోవచ్చు.

యమునోత్రి ఆలయ తలుపులను ఉదయం 10:28కి మూసివేశారు. శనిదేవ్ మహారాజు నేతృత్వంలో యమునాదేవి ఉత్సవ పల్లకీ సాంప్రదాయ వాయిద్యాలు, జానపద నృత్యాల మధ్య కరసాలి గ్రామానికి చేరుకుంది. అమ్మవారి పుట్టిల్లుగా భావించే ఈ గ్రామంలో గ్రామస్తులు పూల వర్షం కురిపిస్తూ పల్లకీకి ఘన స్వాగతం పలికారు.

ఈ యాత్ర సీజన్‌లో కేదార్‌నాథ్‌ను 19 లక్షల 13 వేల మందికి పైగా, యమునోత్రిని 8 లక్షల 84 వేల మందికి పైగా భక్తులు దర్శించుకున్నారు. రెండు క్షేత్రాలను కలిపి 27 లక్షల 57 వేల మందికి పైగా భక్తులు సందర్శించారు. ఆరు నెలల కాలంలో యమునోత్రి ఆలయానికి హుండీలు, రసీదు పుస్తకాల ద్వారా ₹90 లక్షలకు పైగా విరాళాలు అందాయి.