భారీ వర్షంతో కేరళలో హై అలర్ట్: ఎన్డీఆర్ఎఫ్ బృందాలు మోహరింపు, రిజర్వాయర్లలో నీరు కొరత

కేరళలో భారీ వర్షాలు బీభత్సం సృష్టిస్తున్న నేపథ్యంలో రాష్ట్రాన్ని హై అలర్ట్‌లో ఉంచారు. కొన్ని ప్రాంతాల్లో 300 మిల్లీమీటర్లకు పైగా వర్షపాతం నమోదు కావడంతో విపత్తు నిర్వహణ యంత్రాంగం పూర్తిస్థాయిలో అప్రమత్తం చేసింది. రాష్ట్ర విపత్తు నిర్వహణ అథారిటీ (ఎస్డీఎంఏ) అధికారి శేఖర్ లూకోస్ కురియాకోస్ ఈ మేరకు వివరాలు వెల్లడించారు.

భారీ వర్షపాతం నేపథ్యంలో ర్యాపిడ్ రెస్పాన్స్ టీమ్‌లు, ఎమర్జెన్సీ రెస్పాన్స్ టీమ్‌లు సిద్ధంగా ఉంచామని ఆయన తెలిపారు. అయితే నేటి నుంచి వర్షం తీవ్రత తగ్గుతుందని, గత రెండు రోజులతో పోలిస్తే ఈ రోజు వర్షపాతం చాలా తక్కువగా ఉంటుందని, వచ్చే రోజుల్లో మరింత తగ్గుతుందని వివరించారు. ఈ నెల 7వ తేదీ నాటికి మరోమారు వర్షాలు కొద్ది మోతాదులో పుంజుకునే అవకాశం ఉందని, అయితే అవి పెద్దగా తీవ్రంగా ఉండవని చెప్పారు.

ముందు జాగ్రత్త చర్యల్లో భాగంగా రాష్ట్రంలో క్యాప్ సందేశాలు జారీ చేసి ప్రజలను అప్రమత్తం చేశారు. తొమ్మిది ఎన్డీఆర్ఎఫ్ బృందాలను రాష్ట్రంలో ముందస్తుగా మోహరించామని కురియాకోస్ తెలిపారు. అగ్నిమాపక, రెస్క్యూ దళాలు, ఆప్తిత్ర టీమ్‌లు, సివిల్ డిఫెన్స్ వాలంటీర్లు రంగంలో చురుగ్గా సహాయక చర్యలు నిర్వహిస్తున్నారు. ప్రజాప్రతినిధులు కూడా ఫీల్డ్‌లో ఉండి ఈ పనులను ముందుండి నడిపిస్తున్నారు. ముఖ్యమంత్రి ప్రతిరోజు పరిస్థితిని సమీక్షిస్తూ అవసరమైన మార్గదర్శనం చేస్తున్నారని ఆయన వివరించారు.

అయితే నీటి వనరుల పరంగా చూస్తే రాష్ట్రం ఇంకా కొరతలోనే ఉంది. చాలా ప్రధాన జలాశయాల్లో నీటి నిల్వ 40 శాతం కంటే తక్కువగా ఉందని కురియాకోస్ పేర్కొన్నారు. ఈ ఏడాది ఎల్ నినో ప్రభావం ఉన్నందున ఇది ఊహించినదే అని, అయితే వచ్చే రోజుల్లో నీటి నిర్వహణపైనే దృష్టి పెట్టాల్సి ఉంటుందని ఆయన స్పష్టం చేశారు.