ఖమ్మం జిల్లా సత్తుపల్లిలో ప్రైవేట్ గోదాంలో భారీగా పుస్తకాలు సీజ్

ఖమ్మం జిల్లా సత్తుపల్లి పట్టణంలో మండల విద్యాశాఖ అధికారులు ఆకస్మిక తనిఖీలు నిర్వహించారు. విద్యార్థి సంఘం నాయకుల ఫిర్యాదుతో ఓ నివాసంలో ప్రైవేట్ స్కూల్ పేరుతో పుస్తకాలు, నోట్‌బుక్‌లు విక్రయిస్తున్న ఘటన బయటపడింది.

అధికారులు సంఘటనా స్థలానికి చేరుకుని శ్రీ చైతన్య బ్రాండ్ లేబుల్‌తో భారీ సంఖ్యలో పాఠ్యపుస్తకాలు, బెల్టులు, ఇతర విద్యా సామగ్రి నిల్వ ఉంచినట్లు గుర్తించారు. వాటిని సీజ్ చేశారు.

మండల విద్యాశాఖ అధికారి మాట్లాడుతూ, ఉన్నతాధికారుల సూచనల మేరకు తగిన చర్యలు తీసుకుంటామని తెలిపారు. ఈ విషయంపై దర్యాప్తు కొనసాగుతోంది.

విద్యార్థి సంఘం నేతలు మాట్లాడుతూ, ప్రైవేట్ స్కూళ్లు తమ బ్రాండ్‌తో పుస్తకాలు, యూనిఫామ్‌లను విక్రయించడం విద్యా హక్కు చట్టం (RTE), MS 91 నిబంధనలకు విరుద్ధమని ఆరోపించారు. పాఠశాల ఫీజుతో పాటు పుస్తకాల పేరుతో అధిక మొత్తాలు వసూలు చేస్తున్నారని విమర్శించారు. ప్రభుత్వం ఈ తరహా విద్యా సంస్థలపై చర్యలు తీసుకోవాలని డిమాండ్ చేశారు.

ప్రస్తుతం ఆ గోదాంను అధికారులు సీజ్ చేసి, నిల్వ మొత్తాన్ని స్వాధీనం చేసుకున్నారు. ఉన్నతాధికారుల సూచన కోసం ఎదురుచూస్తున్నట్లు సమాచారం.