ప్రొఫెసర్ జయశంకర్, గద్దర్‌కు ఎమ్మెల్సీ కోదండరాం నివాళి

హైదరాబాద్‌లోని నాంపల్లి తెలంగాణ జనసమితి రాష్ట్ర కార్యాలయంలో ఎమ్మెల్సీ కోదండరాం ప్రొఫెసర్ జయశంకర్, ప్రజా గాయకుడు గద్దర్‌లకు నివాళులు అర్పించారు. ఆచార్య జయశంకర్ జయంతి, గద్దర్ వర్ధంతి సందర్భంగా వారి చిత్రపటాలకు పూలమాలలు వేశారు.

అనంతరం ఎమ్మెల్సీ కోదండరాం మాట్లాడారు. ‘ఆచార్య జయశంకర్, గద్దర్‌ల జీవితాలు ప్రజాస్వామ్య మార్గంలో సామాజిక మార్పు సాధ్యమని నిరూపించాయి’ అని అన్నారు. తెలంగాణ ఉద్యమం కేవలం భావోద్వేగంతో కాకుండా స్పష్టమైన చారిత్రక కారణాలతో సాగిందని వివరించారు.

‘ఆరు దశాబ్దాల పాటు ఉద్యమానికి దిశానిర్దేశం చేసి తెలంగాణ వాదాన్ని ప్రపంచానికి చాటిచెప్పిన మహనీయుడు జయశంకర్; పాటలతో ఉద్యమాన్ని ఊపిరిపోసిన వ్యక్తి గద్దర్’ అని కోదండరాం పేర్కొన్నారు. వారి స్ఫూర్తితో తెలంగాణ నిర్మాణానికి అందరూ పూనుకోవాలని పిలుపునిచ్చారు. ఉద్యమం వెనకున్న కారణాలను అర్థం చేసుకుని రాష్ట్ర అభివృద్ధికి మార్గనిర్దేశం చేసుకోవాలన్నారు.