బీఆర్ఎస్ నుంచి వచ్చిన ఎమ్మెల్యేలపై కోమటిరెడ్డి రాజగోపాల్ రెడ్డి విమర్శ

మునుగోడు ఎమ్మెల్యే కోమటిరెడ్డి రాజగోపాల్ రెడ్డి బీఆర్ఎస్ నుంచి కాంగ్రెస్‌లోకి వచ్చిన ఎమ్మెల్యేలపై విమర్శలు చేశారు. వారు అసలు కాంగ్రెస్ కార్యకర్తలను వేధిస్తున్నారని, అక్రమ కేసులు పెడుతున్నారని ఆరోపించారు.

నకరేకల్, తుంగతుర్తి వంటి నియోజకవర్గాల్లో కాంగ్రెస్‌తో సంబంధం లేని వ్యక్తులకు టికెట్లు ఇచ్చినా, కార్యకర్తలు సొంత డబ్బులు ఖర్చు చేసి గెలిపించారని తెలిపారు. అయితే ఆ ఎమ్మెల్యేలు ఇప్పుడు వారిపై కేసులు పెట్టి వేధిస్తున్నారని ఆరోపించారు.

బీఆర్ఎస్ నుంచి వచ్చిన ఎమ్మెల్యేల వెంట బీఆర్ఎస్ కార్యకర్తలు సైతం వచ్చి, అసలు కాంగ్రెస్ కార్యకర్తలపై దాడులు చేస్తున్నారని కూడా రాజగోపాల్ రెడ్డి ఆవేదన వ్యక్తం చేశారు. గెలిచిన తర్వాత కూడా, నామినేటెడ్ పోస్టులు, స్థానిక సంస్థల ఎన్నికల టికెట్లు మాత్రం ఆ ఎమ్మెల్యేల తరపున వచ్చిన వారికే ఇస్తూ, మొదటి నుంచి కాంగ్రెస్ కోసం పనిచేసిన వారిని పట్టించుకోవడం లేదని విమర్శించారు.

కోమటిరెడ్డి రాజగోపాల్ రెడ్డి చాలా కాలంగా సైలెంట్‌గా ఉన్నారు. మంత్రి పదవి విషయంలోనూ అధిష్టానంపై అసంతృప్తి వ్యక్తం చేశారు. ఈ వ్యాఖ్యలు కాంగ్రెస్ పార్టీలో అంతర్గత విభేదాలకు సంకేతంగా చర్చనీయాంశంగా మారాయి. అధిష్టానం ఈ విషయంలో ఎలా స్పందిస్తుందో చూడాల్సి ఉంది.