టాలీవుడ్ హీరోలు ఏపీలో షూటింగ్లు చేయాలని అంబికా కృష్ణ పిలుపు

సినీ నిర్మాత అంబికా కృష్ణ టాలీవుడ్ హీరోలకు ఒక విజ్ఞప్తి చేశారు. కనీసం ఒక్క షెడ్యూల్ అయినా ఆంధ్రప్రదేశ్లో చిత్రీకరించాలని ఆయన కోరారు.

రాష్ట్ర విభజన తర్వాత ఫిల్మ్ ఇండస్ట్రీ తెలంగాణలో కేంద్రీకృతం కావడం, ఇక ఏపీలో షూటింగ్లు గణనీయంగా తగ్గడాన్ని ఆయన ప్రస్తావించారు. హీరోలు ఆంధ్రప్రదేశ్లో పుట్టి పెరిగి, మొదటి ముద్ద అక్కడే తిన్నా, ఇప్పుడు విదేశాలు, ఇతర రాష్ట్రాలకు వెళ్లి సినిమాలు తీస్తున్నారని వివరించారు.

ఇటీవల నటుడు నందమూరి బాలకృష్ణ అమరావతిలో ఒక సినిమా ప్రారంభోత్సవం నిర్వహించిన ఘటనను ఆయన గుర్తు చేశారు. అప్పుడు లోకేశ్ బాబు క్లాప్ కొట్టారని తెలిపారు. గత 20 ఏళ్లలో ఏపీలో ఒక్క పెద్ద సినిమా కూడా క్లాప్ పడలేదన్నారు.

16 మంది ప్రముఖ హీరోలు ఒక్కొక్కరు 20 రోజుల చొప్పున ఏపీలో షూటింగ్ చేస్తే ఏడాదికి 320 వర్కింగ్ డేస్ లభిస్తాయని అంబికా కృష్ణ లెక్కించారు. దీనివల్ల స్థానిక కళాకారులు, సైడ్ ఆర్టిస్టులు, టెక్నీషియన్లకు ఉపాధి దొరుకుతుందన్నారు.

సినిమాలలో తెలంగాణ యాస ప్రాబల్యం పెరిగిపోయి, ఏలూరు, విజయవాడ, మచిలీపట్నం ప్రాంతాల సహజమైన తెలుగు యాస కనుమరుగవుతోందని ఆయన ఆవేదన వ్యక్తం చేశారు. దర్శకుడు అనిల్ రావిపూడి సంక్రాంతి సినిమాలో అచ్చమైన తెలుగు భాష వాడిన ఘటనను ఆదర్శంగా చూపారు.

దివంగత నందమూరి తారక రామారావు, అక్కినేని నాగేశ్వరరావు చలనచిత్ర పరిశ్రమను ఏపీకి తీసుకువచ్చేందుకు శ్రమించారని గుర్తు చేశారు. వారి ఆలోచనలకు అనుగుణంగానే బాలకృష్ణ ఈ ఒక్క సారైనా ముందుకొచ్చి ఏపీలో షూటింగ్ ప్రారంభించారని అంబికా కృష్ణ అభిప్రాయపడ్డారు. అందరు హీరోలు ఏపీలో షెడ్యూల్స్ కేటాయించి, ఆంధ్రప్రదేశ్‌ను మరో ఫిల్మ్ ఇండస్ట్రీ కేంద్రంగా మార్చాలని ఆయన కోరారు.