పూజ గది తలుపులు పూజ అనంతరం 24 నిమిషాలు తెరిచి ఉంచాలి: ఆచార్య సూర్యనారాయణ మూర్తి

పూజ గది తలుపులను పూజ ముగించిన వెంటనే మూసివేయరాదని ప్రముఖ ఆధ్యాత్మిక వేత్త ఆచార్య కాకునూరి సూర్యనారాయణ మూర్తి సూచించారు. ఇంట్లో పూజా గది హృదయ స్థానంగా ఉంటుందని, ధూపం, దీపం, నైవేద్యం సమర్పించిన తర్వాత 24 నిమిషాల పాటు తలుపులు తెరిచి ఉంచాలన్నారు.

ఈ 24 నిమిషాల సమయాన్ని ఒక ఘడియ ప్రమాణంగా ధర్మశాస్త్రాలు గుర్తించాయని ఆయన వివరించారు. ఈ సమయంలో అగరబత్తుల పొగ, సామ్రాణి సువాసనలు ఇల్లంతా వ్యాపించి ఇంటిని పవిత్రం చేస్తాయి. పూజ తర్వాత తీర్థ ప్రసాదాలు స్వీకరించి, నమస్కారం చేసి అనంతరం తలుపులు మూయాలి.

24 నిమిషాల తర్వాత తలుపులు పూర్తిగా మూయకుండా కాస్త ఓరగా వేయడం మంచిది. దీనివల్ల ఇంట్లో సాధారణ వాతావరణం కొనసాగుతుంది. పెద్ద ఇళ్లు, ప్రత్యేక గదులు ఉంటే ఎల్లవేళలా తలుపులు తెరిచి ఉంచవచ్చు. చిన్నపాటి అపార్ట్మెంట్లు, ఆధునిక గృహాల్లో తలుపులు కాస్త దగ్గరగా వేయడం ఉత్తమమని ఆచార్య మూర్తి తెలిపారు.

ధర్మ సందేహాలు కార్యక్రమంలో భాగంగా ఒక ప్రేక్షకుడి ప్రశ్నకు సమాధానంగా ఆచార్య మూర్తి ఈ విషయాలు వెల్లడించారు.