మెజారిటీ హామీ లేకపోతే పోటీ చేయను: మంత్రి కోమటిరెడ్డి వెంకట్ రెడ్డి

నల్గొండ జిల్లాలో పర్యటించిన మంత్రి కోమటిరెడ్డి వెంకట్ రెడ్డి, వచ్చే ఎన్నికల్లో తాను పోటీ చేసేది ప్రజలు అత్యధిక మెజారిటీతో గెలిపిస్తామని హామీ ఇస్తేనే అని స్పష్టం చేశారు. లేకపోతే ఎన్నికల బరిలో నిలబడనని ఆయన తెలిపారు. తనకు సొంత ఆస్తులు లేవని, అద్దె ఇంట్లో నివసిస్తున్నానని, కేవలం మూడు ఎకరాల భూమి మాత్రమే ఉందని ఆయన పేర్కొన్నారు.

ప్రజలు తన అభివృద్ధి పనులను చూసి ఓటు వేయాలని, తాను ప్రచారానికి రాకపోయినా అభివృద్ధే తన శాశ్వత ప్రచారమని ఆయన అన్నారు. అయితే, ఆయన వ్యాఖ్యలు రిక్వెస్టా లేక బెదిరింపా అనే చర్చ మొదలైంది.

వెంకట్ రెడ్డి, ఆయన సోదరుడు రాజగోపాల్ రెడ్డి ఇద్దరూ కాంగ్రెస్ పార్టీని అధికారంలోకి తీసుకువచ్చేందుకు కీలక పాత్ర పోషించారు. కానీ రేవంత్ రెడ్డి పీసీసీ అధ్యక్షుడిగా, తర్వాత ముఖ్యమంత్రిగా బాధ్యతలు చేపట్టినప్పటి నుంచి కోమటిరెడ్డి సోదరులతో విభేదాలు కొనసాగుతున్నాయి. వెంకట్ రెడ్డి గతంలో పీసీసీ పదవిని కొనుగోలు చేశారంటూ విమర్శించిన సంగతి తెలిసిందే.

మంత్రి వ్యాఖ్యలపై సోషల్ మీడియాలో విస్తృతంగా చర్చ జరుగుతోంది. నెటిజన్లు ఆయన తీరుపై విమర్శలు చేస్తున్నారు. రేవంత్ రెడ్డి వర్గం కోమటిరెడ్డి సోదరులను రాజకీయంగా సైడ్ చేస్తోందన్న ప్రచారం కూడా జరుగుతోంది. ఈ విషయంపై ముఖ్యమంత్రి రేవంత్ రెడ్డి స్పందన తెలియాల్సి ఉంది.