కోనసీమలో గోదావరి వంతెన 75% పూర్తి, వచ్చే ఏడాది మార్చిలో ప్రారంభం

అంబేద్కర్ కోనసీమ జిల్లా పి. గన్నవరం మండలం గంటి పెదపూడి వద్ద గోదావరి నదిపై నిర్మిస్తున్న వంతెన 75% పూర్తయింది. వచ్చే ఏడాది మార్చి నాటికి ఈ వంతెనను ప్రారంభించనున్నట్టు అధికారులు తెలిపారు.

ఈ వంతెనను సుమారు రూ.72 కోట్లతో నిర్మిస్తున్నారు. గోదావరి నదిపై సుమారు 2 కిలోమీటర్ల పొడవున దీన్ని నిర్మించారు. ఇది అందుబాటులోకి వస్తే నాలుగు లంక గ్రామాల ప్రజలకు రోడ్డు సౌకర్యం లభిస్తుంది.

బూరుగులంక, గంటి పెదపూడి లంక, అరిగేల వారి పేట, ఊడిమూడి లంక గ్రామాలకు రోడ్డు సౌకర్యం లేదు. ఏటా వరదల సమయంలో సుమారు నాలుగు నెలల పాటు ప్రజలు పడవలపైనే రాకపోకలు సాగిస్తున్నారు. అత్యవసర సమయాల్లో ప్రయాణం కష్టంగా ఉంది.

పంచాయతీరాజ్ శాఖ డిప్యూటీ ఎగ్జిక్యూటివ్ ఇంజనీర్ అన్యం రాంబాబు మిగతా పనులు త్వరలో పూర్తి చేస్తామని చెప్పారు. వచ్చే ఏడాది మార్చి నుంచి వంతెనపై రాకపోకలు సాగించేలా అందుబాటులోకి తెస్తామని ఆయన తెలిపారు.