సింహవాహిని అమ్మవారి బోనాల్లో కొండా సురేఖ: ప్రత్యేక ఏర్పాట్లు

హైదరాబాద్‌లోని లాల్ దర్వాజా సింహవాహిని అమ్మవారి ఆలయంలో బోనాల ఉత్సవాలు వైభవంగా జరుగుతున్నాయి. రాష్ట్ర దేవాదాయ శాఖ మంత్రి కొండా సురేఖ ఈరోజు అమ్మవారికి బోనం సమర్పించారు. ఈ సందర్భంగా భక్తులు పెద్ద సంఖ్యలో పాల్గొన్నారు.

అమ్మవారి ప్రాంగణంలో భక్తుల రద్దీ గంట గంటకు పెరుగుతోంది. బోనం తీసుకొచ్చే మహిళలకు ప్రత్యేక క్యూ లైన్లు ఏర్పాటు చేశారు. వీఐపీలు, దివ్యాంగులు, గర్భిణీలు, చిన్న పిల్లల తల్లులకు వేర్వేరు మార్గాల ద్వారా దర్శనం కల్పిస్తున్నారు. 41 సీసీ కెమెరాలు, ఫేషియల్ రికగ్నిషన్ సదుపాయంతో భద్రత కట్టుదిట్టం చేశారు.

ఈ సందర్భంగా మంత్రి కొండా సురేఖ మాట్లాడుతూ బోనాల పండుగ చరిత్రను వివరించారు. పూర్వం ప్లేగు వ్యాధి విజృంభించినప్పుడు ప్రజలు అమ్మవారిని ప్రార్థించారని, వ్యాధి తగ్గితే బోనం (భోజనం) సమర్పిస్తామని మొక్కుకున్నారని తెలిపారు. ఆ సంప్రదాయం వందల ఏళ్లుగా కొనసాగుతోందన్నారు. అమ్మవారికి బోనం సమర్పిస్తే కోరికలు తీరుతాయనే విశ్వాసం ఉందని చెప్పారు.

రాష్ట్ర ప్రభుత్వం బోనాల నిర్వహణకు రూ.20 కోట్ల నిధులు కేటాయించిందని అధికారులు తెలిపారు. అన్ని ఆలయాల్లో భక్తులకు ఎలాంటి ఇబ్బందీ లేకుండా ఏర్పాట్లు చేస్తున్నామని మంత్రి పేర్కొన్నారు. ఈరోజు సాయంత్రం శాంతి కళ్యాణం, రేపు రంగం భవిష్యవాణి కార్యక్రమాలు నిర్వహించనున్నారు.