కొండగట్టు అంజన్నకు 60 ఏళ్ల తర్వాత చంద్రోత్సవం.. 21 నుంచి నిజరూప దర్శనం

జగిత్యాల జిల్లా మల్యాల మండలంలోని కొండగట్టు శ్రీ ఆంజనేయ స్వామి ఆలయంలో దాదాపు 60 ఏళ్ల తర్వాత చంద్రోత్సవం జరగనుంది. ఈ నెల 16 నుంచి 20 వరకు ఐదు రోజుల పాటు చంద్రోత్సవం, మహా సంప్రోక్షణ కార్యక్రమాలు నిర్వహిస్తున్నారు.

స్వామి మూలవిరాట్టుపై సుమారు ఆరు అంగుళాల మేర సింధూరం పేరుకుపోయింది. దీంతో భక్తులకు అంజన్న నిజరూప దర్శనం లభించడం లేదు. ఆగమ శాస్త్ర సంప్రదాయం ప్రకారం ఈ సింధూరాన్ని తొలగించాలని ఆలయ అర్చకులు నిర్ణయించారు. రావి, జువ్వి, మర్రి, మేడి, ధరిమి చెట్ల కలపను సేకరించి సాంప్రదాయ పద్ధతిలో ఈ కార్యక్రమం చేపడుతున్నారు.

ఈ ఐదు రోజుల పాటు మూలవిరాట్టు దర్శనాన్ని నిలిపివేస్తున్నారు. ప్రత్యామ్నాయంగా ఆలయంలో ప్రత్యేకంగా ఏర్పాటు చేసిన కర్ర ఆంజనేయస్వామి ఉత్సవ మూర్తిని భక్తులు దర్శించుకోవచ్చు. వెంకటేశ్వర స్వామి, మహాలక్ష్మీ అమ్మవారి దర్శనం కూడా కల్పిస్తున్నారు.

కొండగట్టు ఆలయానికి ప్రత్యేక విశిష్టత ఉంది. దేశంలో మరెక్కడా లేని విధంగా ఇక్కడ స్వామి రెండు ముఖాలతో దర్శనం ఇస్తారు. తూర్పు వైపు నరసింహ స్వామిగా, ఉత్తరం వైపు ఆంజనేయ స్వామిగా కొలువై ఉన్నారు. శనివారం, మంగళవారాల్లో స్వామికి చందనం సమర్పించడం ఆనవాయితీ. 60 ఏళ్ల క్రితం ఇదే విధంగా చందనాన్ని తొలగించి నిజరూప దర్శనం కల్పించినట్టు పెద్దల ద్వారా తెలుస్తోంది.

చంద్రోత్సవం ముగిసిన తర్వాత ఈ నెల 21 నుంచి భక్తులకు నిజరూప దర్శనం ప్రారంభమవుతుంది. వరుసగా 41 రోజుల పాటు ఈ అవకాశం ఉంటుందని, డిసెంబర్ 29 వరకు దర్శనం కల్పిస్తామని ఆలయ అర్చకులు తెలిపారు. రోజుకు సుమారు 50 వేల మంది, మొత్తం 20 లక్షల మంది భక్తులు వస్తారని అంచనా వేస్తున్నారు.

భక్తుల రద్దీని దృష్టిలో పెట్టుకుని జిల్లా యంత్రాంగం ప్రత్యేక ఏర్పాట్లు చేస్తోంది. తాగునీరు, పారిశుధ్యం, భద్రత, దర్శన క్యూ నిర్వహణపై ప్రత్యేక దృష్టి పెట్టారు. జిల్లా కలెక్టర్ ఏర్పాట్లపై సమీక్షించి, రద్దీకి అనుగుణంగా ముందస్తు ప్రణాళికలు సిద్ధం చేయాలని అధికారులను ఆదేశించారు. వివిధ శాఖలు సమన్వయంతో పని చేయాలని సూచించారు.