అవనిగడ్డ విద్యార్థి మృతి: ఆందోళనకారులపై పోలీసుల లాఠీచార్జ్

కృష్ణా జిల్లా అవనిగడ్డలోని బీసీ వెల్ఫేర్ ఆశ్రమ పాఠశాలలో 10వ తరగతి చదువుతున్న విద్యార్థి అనుమానాస్పద స్థితిలో మృతి చెందాడు. నిన్న రాత్రి ఈ ఘటన జరిగినట్లు సమాచారం. దీంతో పాఠశాల పరిసరాల్లో ఉద్రిక్తత నెలకొంది.

మృతి చెందిన విద్యార్థి కుటుంబ సభ్యులు, ఉపాధ్యాయ సంఘాలు ఆందోళనకు దిగాయి. మృతికి కారణాలు వెల్లడించాలని వారు డిమాండ్ చేస్తున్నారు. వారు జాతీయ రహదారిపై ధర్నా చేపట్టి రాస్తారోకో నిర్వహించారు.

ఈ నేపథ్యంలో నిరసనకారులపై పోలీసులు లాఠీచార్జ్ చేశారు. ప్రభుత్వ ఏరియా ఆసుపత్రిలోకి ఎవరినీ అనుమతించవద్దని పోలీసులు ఆంక్షలు విధించారు. నిరసనలో పాల్గొన్న కొందరిని అరెస్టు చేసి పోలీస్ స్టేషన్‌కు తరలించారు. పోలీసుల తీరుపై కుటుంబ సభ్యులు, ఉపాధ్యాయ సంఘాలు అసంతృప్తి వ్యక్తం చేశాయి.

ఘటన జరిగిన ప్రాంతంలో మోపిదేవి పోలీసులు భారీగా మోహరించారు. ఘటనపై ఇప్పటికే కేసు నమోదు చేశారు. అవనిగడ్డ పరిసర ప్రాంతాల్లో ఆందోళన కొనసాగుతోంది.