నిజామాబాద్‌లో దీపావళి వేడుకలు: నువ్వుల నూనె దీపాలతో లక్ష్మీ పూజ

నిజామాబాద్‌లో దీపావళి పండగను ప్రజలు భక్తిశ్రద్ధలతో జరుపుకుంటున్నారు. ఇళ్ల ముందు నువ్వుల నూనెతో దీపాలు వెలిగించి లక్ష్మీదేవిని ఆహ్వానిస్తున్నారు. ప్రతి ఇంట ధనధాన్యాలు, సిరిసంపదలు, సుఖసంతోషాలు కలగాలని కోరుకుంటున్నారు. సాయంత్రం పిల్లలతో కలిసి టపాకాయలు కాల్చుతూ ఆనందంగా జరుపుకుంటున్నారు.

దీపావళి పండగ వెనుక ఉన్న ఆధ్యాత్మిక విశిష్టతను నిజామాబాద్ నీలకంటేశ్వర ఆలయ పూజారి శేఖర్ వివరించారు. దీపావళి అంటే ముందుగా గుర్తుకు వచ్చేది నరక చతుర్దశి అని ఆయన అన్నారు. ఆ రోజు సూర్యోదయానికి ముందే కాలకృత్యాలు పూర్తి చేసుకుంటారని తెలిపారు. అభ్యంగన స్నానం చేసి మంగళ హారతులు తీసుకుంటారని చెప్పారు.

దీపావళి మూడు రోజుల పండగ అని పూజారి శేఖర్ తెలిపారు. మొదటి రోజు నరక చతుర్దశి, రెండో రోజు దీపావళి, మూడో రోజు పలిపాడ్యమి జరుపుకుంటారు. పలిపాడ్యమి రోజు అన్నదమ్ములు చెల్లెలి చేత్తో అన్నం తింటారని ఆయన చెప్పారు. దీపావళి తెల్లవారు జాము నుంచి కార్తీక మాసం ప్రారంభమవుతుందని తెలిపారు.

ఇంటి ముందు దీపాలంకరణ చేసేటప్పుడు నువ్వుల నూనెతో దీపాలు వెలిగించడం మంచిదని శాస్త్రాలు చెప్తున్నాయని పూజారి అన్నారు. ఇతర కొవ్వత్తులతో ఎవరూ దీపాలు వెలిగించరని ఆయన తెలిపారు.

పటాకుల విషయంలో ఆయన విజ్ఞప్తి చేశారు. పూర్తిగా పటాకులు కాల్చే బదులు దాన్ని 50 శాతానికి తగ్గించాలని కోరారు. లక్ష్మీదేవి బొమ్మ ఉన్న లక్ష్మీ బాంబులు, శివాజీ బొమ్మ ఉన్న శివాజీ బాంబులు కాల్చవద్దని సూచించారు.

దీపావళి రోజు అమావాస్య కావడంతో లక్ష్మీదేవిని ఆరాధ్య దేవతగా పూజిస్తారు. ఇళ్లలో, వ్యాపార సంస్థల్లో లక్ష్మీ పూజలు నిర్వహిస్తారు. ఈసారి ఆదివారం 8వ తేదీ మధ్యాహ్నం 11:30 నుంచి సోమవారం అర్ధరాత్రి 12 గంటల వరకు అమావాస్య కాలం ఉందని పూజారి శేఖర్ తెలిపారు. ప్రదోష కాలంలో లక్ష్మీ పూజలకు ప్రాధాన్యత ఇస్తారని ఆయన చెప్పారు.