కొండాపూర్ కొత్తగూడలో డ్రైనేజీ పైప్‌లైన్ పనులు ఆరు నెలలుగా పూర్తికాకపోవడంతో నివాసితులకు తీవ్ర ఇబ్బందులు

హైదరాబాద్‌లోని కొండాపూర్ కొత్తగూడ ప్రాంతంలో జలమండలి చేపట్టిన డ్రైనేజీ పైప్‌లైన్ పనులు ఆరు నెలలుగా పూర్తికాకపోవడంతో నివాసితులు తీవ్ర ఇబ్బందులు ఎదుర్కొంటున్నారు.

రోడ్లు తవ్వి, జేసీబీ యంత్రాలు వదిలేసి పనులు సగంలో నిలిపివేశారని వారు చెబుతున్నారు. దీంతో వర్షపు నీరు, మురుగునీరు నిలిచిపోయి నడవడానికి కూడా వీలులేకుండా ఉంది.

అంతేకాకుండా, మంచినీటి పైప్‌లైన్లలో డ్రైనేజీ నీరు కలుస్తుండటంతో తాగునీరు కలుషితమవుతోంది. దీని వల్ల చిన్నారులు, హాస్టల్ విద్యార్థులు వ్యాధుల బారిన పడుతున్నారని స్థానికులు ఆవేదన వ్యక్తం చేస్తున్నారు.

జీహెచ్ఎంసీ, జలమండలికి పలుమార్లు ఫిర్యాదు చేసినా సరైన పరిష్కారం లభించలేదని వారు చెబుతున్నారు. ఇటీవల అధికారులు వచ్చి పరిశీలించి వెళ్లినా చర్యలు తీసుకోలేదు. ఇక రేపు బోనాలు పండుగ సందర్భంగా కాలనీలో పరిశుభ్రత లేకపోవడంతో పండుగ జరుపుకోవడం కష్టంగా మారిందని వాపోతున్నారు.

సమీపంలోని ఒక హోటల్ (షాక్ హౌస్) పైప్‌లైన్ వల్ల డ్రైనేజీ లైను జామ్ అవుతుందని, ఆ హోటల్‌ను సీల్ చేసి ప్రత్యేక లైను ఏర్పాటు చేయాలని నివాసితులు డిమాండ్ చేస్తున్నారు. జలమండలి అధికారుల స్పందనపై సమాచారం లభ్యం కాలేదు.