కోటి పసుపుకొమ్ములతో కంచి కామాక్షి అమ్మవారికి విశేష అర్చన

కార్తీక మాసం సందర్భంగా నిర్వహిస్తున్న కోటి దీపోత్సవంలో కంచి కామాక్షి అమ్మవారికి కోటి పసుపుకొమ్ములతో విశేష అర్చన జరిగింది. మూలా నక్షత్రం రోజున ఈ అర్చన నిర్వహించారు.

కంచి పీఠం నుంచి అమ్మవారి దివ్య దర్శనం, శ్రీ శంకర విజయేంద్ర సరస్వతి స్వామి పాదుకలు ఈ ప్రాంగణానికి తీసుకురావడం జరిగింది. భక్తులు రెండు చేతులు జోడించి ఈ పాదుకలను దర్శించుకున్నారు.

పసుపుకొమ్ములు భక్తుల ముందు అమ్మవారి రూపంగా ఏర్పాటు చేశారు. భక్తులు 'ఓం కంచి కామాక్షి నమః' అంటూ పసుపుకొమ్ములతో అర్చన చేశారు.

పూజలో మహాగణపతి పూజ, పుణ్యాహవచనం, సంకల్పం, ప్రాణాయామం, అమ్మవారికి హరిద్ర, కుంకుమ, పుష్ప అర్చనలు జరిగాయి. భక్తులు తమ గోత్రం, కుటుంబ వివరాలతో సంకల్పం చేసుకున్నారు.

కోటి దీపోత్సవంలో భాగంగా కోటి లింగార్చన కూడా చేపట్టారు. అమ్మవారి అనుగ్రహంతో సకల సౌభాగ్యాలు, ఆరోగ్యం కలుగుతాయని పూజా కార్యక్రమంలో భక్తులకు తెలిపారు.